Biodiversity humhalh dan tur ngaihtuah

Mizoram State Biodiversity Board chu nimin khan an chairman Lal Thanhawla, chief minister hoin Cabinet Room-ah an ṭhu a; International Day for Biodiversity 2018 hman dan tur leh Mizorama nungchateleh thing leh maute (biodiversity) humhalh kawnga thil pawimawhte an ngaihtuah.

Chief Minister chuan, biodiversity lam ngaihven leh tui tak tak Mizo zinga an awm zel chu lawmawm a tih thu a sawi a, "Mizoram hi biodiversity hotspot a ni a, heng hausaknate hi hun rei tak hriat chian leh hriatthiam loh vanga ngaihthah a hlawh loh tawh hnua kan harh thar a, humhalh tura mimal leh pawl anga pên chhuak an awm zel hi a lawmawm hle a ni," a ti.

State Biodiversity Board ṭhukhawm chuan, Mizorama tualṭo hnim, thlai leh nungcha hrang hrang humhalh kawnga páwn lam aṭanga lo lut, Mizoram chhunga mi rawn luahlan thei 'Invasive alsen Species' an tih ho khuahkhirh tura hma lak dan tur an sawiho a ni. Sik leh sá inthlakin biodiversity a nghawng dan zirchian chunghcang sawi lan a ni a, chumi atan chuan mawhphurtu department hrang hrangin research cell an neihte hmang ṭangkaiin zirchianna lo nei se, tiin an rêl.

National Biodiversity Authority-in khaw tinah Biodiversity Management Committee (BMC) siam turin state tinte a beisei a; Committee hian an khua leh a chhehvela thing leh mau leh nungcha awm dan leh awm tharte an chhinchhiah ang a, chungte chu hmalak zelna atan inbehchhanna tur database ṭha tak a nih beisei a ni.