Tih hreh nei loah Congress leh MNF puh

MPC party ṭhalaite chuan thuchhuah siamin, Congress party leh MNF party-te chu Chakma foreigner-te an vote ît vanga khawi ngama vulh liantu-ah leh sorkarna fung an chelhna tur a nih chuan tih hreh an nei lo-ah an puh.

MPCY chuan, tun hnaia Chakma Autonomous District Council (CADC)-a sorkar inṭâwm siam tum chungchang tarlangin, "Congress party leh MNF party-te hi Mizorama Chakma foreigner-te khawi ngamtu, vulh liana an vote ît vanga ram leilung fa Mizote ngaihthah a, Chakma foreigner-te duhsakna hleihluak taka pe a, tunah phei chuan Mizote laka huangtau em em ngam khawpa fuihpawrhtu an ni tih a lang chiang hle," an ti.

MPCY chuan, MNF leh Congress-te hian sorkarna fung an chelhna tur remchang a nih phawt chuan engmah tih hreh an nei lo," an ti a; Mizo ram leh hnamin chhiat phahin retheih phah dawn pawh ni se, pawi tihna mah an nei lo tih a lang chiang tawlh tawlh niin an sawi.

Chakma foreigner, state boundary leh Bru ráltlân chungchangah pawh, a chingfel turin ruling party an pawimawh ber zel tih sawiin MPCY chuan, "MNF leh Congress party-te Mizoramah an sorkar chhung chuan heng thila kan buainate hi chinfel leh fihlim a hnêkin, kan la buai tulh tulh dawn a ni," an ti a; chu chu hre chiang a, kumina MLA inthlanpui lo awm turah pawh MNF leh Congress-te chu sorkarna chelh tlak an ni lo tih hre chianga hnâwl ngam turin Mizo mipui an chah a ni.