January-April, 2018 chhungin Mamit district-ah case 55 ziak lut

Mamit district-a police officer-te chuan nimin khan Mamit SP Davesh Kumar Mahla hoin SP pisa conference hall-ah Crime Review Meeting an nei. Kumin January aṭanga April thla thleng, thla li chhungin Mamit district-ah thubuai 55 ziah luh a ni tawh tih an tarlang.

Crime Review Mee­ting-ah hian Mamit Additional SP, Mamit SDPO, Kawrthah SDPO, West Phaileng SDPO leh district chhunga police station leh ouitpost-a officer-in-charge-te an tel a; kum 2016-2018 chhunga case lian tham (special report case) la chinfel loh pariatte chinfel dan tur te, dan leh thupek kenkawh kawnga ṭan lak dan turte an sawiho bakah, mipui tana ṭangkai zawka an thawh dan turte an sawiho a ni.

Meeting-a tarlan danin, kumin January-April chhung khan Mamit district-ah thubuai 55 ziah luh niin, case kaihhnawiha mihring man zat chu 64 a ni. Chargesheet 29 thehluh a ni tawh a, case convict tawh zat chu panga a ni. Case investigation la tih zawh loh 26 a awm.

Kumin chhunga case an ziah luh tawh dan chu - rûkrûk (theft) case 18, mi in rawk (burglary) case 12, POCSO Act case pathum, NDPS Act case pathum, mi kutthlak (hurt) case pali, tualthah (murder) case pahnih leh MLPC Act case 15 a ni.

Mamit district-ah hian kum 2017 khan January-April chhungin thubuai 60 ziah luh a ni a, nikum aiin kuminah thubuai ziah luh pangain a tlem zawk a ni.