Duhoma'n tui anga nghet loah MNF a puh ; Kan hotupa sulhnu tihpuitlin kan duh - K Sapdanga

Zoram Peoples' Movement (ZPM) chuan nimin khan Lungdai leh Kawnpuiah October 30, 2021-a Tuirial bial MLA by-election lo awm tur atana campaign bulṭanna hun an buatsaih. Lungdaia thusawitu ZPM leader Lalduhoma chuan MNF chu tui anga nghet loah a puh. Kawnpuia thusawitu ZPM working president K Sapdanga chuan an hotupa sulhnu tihpuitlin an duhthu a sawi.

Lalduhoma chuan ZPM-te tui anga nghet loa puhna awm chu chhângin, "MNF tluka tui anga nghet lo an awm lo. MNF hian hmanah chuan independent an sual a, an hlawhchham hnuah an policy leh thuthlung zawng zawng an kalsan vek a, an dan bu thlenga tihdanglam vek a ni. A tira an nihna zinga tun thlenga an la chhawm awm chhun chu hawrawp pathum MNF tih chiah a ni," a ti.

Kum 2019 MP inthlan dawn khan MNF chuan Citizenship Amendment Bill (CAB) an dodal tur thu na takin an tlangaupui nia sawiin ZPM Leader chuan, "Chief Minister ngeiin amah chu central hotute hnena na taka CAB dodaltu a nih thu a sawi hnu lawkah CAB chu an thlawp thu Parliament House-ah an aupui leh si a ni," a ti a, ZPM-in a zawrh mek kalphung thar chu a la kalsan ve ngai loh thu a sawi.

Lalduhoma chuan MNF Pre­sident-in Serchhip bial mipui­te chungchang a sawi chu chhangin, "Therhlo hmanga thlem thluk theih loh, ruling lai hneh thei an nih avangin an inchhuang hle. Inthlan dawnah an candidate chu Hnam Runa hna semtu tia sawiin, mi hrang hrang hnenah hna pek an tiam a ni. Anmahni zawk hi an reh ta vang vang a ni," a ti.

Serchhip bial by-election a hnehna an chang kha ZPM chakna ni loin, mipui chakna a nih thu sawiin, "Inthlan hrang hranga kan chakna pawh mipui chakna vang zel a ni," a ti a; Tuirial bial by-election neih turah pawh mipui chakna hmangin ZPM chuan hnehna an chan leh ngei a beisei thu a sawi.

ZPM working president K Sapdanga chuan an hotupa Andrew H Thangliana'n a kalsan, a sulhnu laklawh tak tak a awm tih an hriat thu sawiin, "Chungte chu chhunzawma tipuitling theitu nih kan duh a, chu chu thawh min phalsak turin Tuirial bial mipuite kan dil che u. Kan duhna hi min hriatsak a, ZPM candidate Pu Laltlanmawia lo vote vek turin, in khawngaihna sang ber kan ngen che u a ni," a ti.

K Sapdanga chuan ZPM chuan lu an sun thu sawiin, "Kan khingpuite pawh hian thinlung takin min sunpui a, mi langsar leh palian an ngah nen, chung mite chu rawn dintir loin, a hminga min buan derna atan candidate pawh nek nuam deuh an rawn tir a ni," a ti a, MNF leh Congress chuan lusunna hmunah Zonunzemawi lantirin, u chan an chan thiam thu a sawi.

Kum 2023 tawp lamah inthlan­pui a awm dawn thu sawiin ZPM Working President chuan, "Chutih hunah chuan Congress sorkar koh kir leh kan duh em? MNF sorkar hi chhunzawm zel turin kan duh em? ZPM pawl enchhin ve tawh kan duh em? Chumi huna inbuatsaihna atan, thinlung taka Pathian rawn hmasaa vote tur thlang turin mipuite kan sawm a ni," a ti.

K Sapdanga chuan ZPM chu kalphung thar zuartu an nih thu sawiin, "Campaign danah pawh kalphung thar hmang ngam turin mipuiin min beisei. Fel lo taka tlin ai chuan, nghah a la ngai a nih pawhin, kan la nghak huam zawk tur a ni," a ti a, khawiahmah MPF-te thlim tur a nih loh thu a sawi.

ZPM candidate Laltlanmawia chuan Tuirial bial mipuite hnenah thil ropui tak tiam tur a nei lo tih sawiin, "Ka tiam theih chhun chu MLA atan thlan tlin ka nih chuan bialtu MLA ka nih anga hamṭhatna awm zawng zawng, hlawh a ni emaw MLA fund a ni emaw a bo a bang awm loin bial mipui tan ka hlan dawn. Chu chu ka tiam theih chhun a ni," a ti.

Laltlanmawia chuan politics-ah a zuang lut ang tih a suangtuah ngai lo tih sawiin, "Tuna sawmna ka dawn hi chunglam kohna ngei nia ngaiin ka chhang ta a ni. Mizoram hi kum 30 chuang state puitling a ni tawh a, ram kaihruaitute hian an theihna zawng zawng an seng chungin tuna Mizoram dinhmun thlirin a lungawithlak loh hle," a ti a, ram chhan turin Pathian mite an pen chhuah a ngaih tak thu a sawi.

ZPM campaign bulṭanna inkhawmah hian AMC councillor pahnih - Baryl Vanneihsangi leh Christina Roluahpuii Sailo bakah, Andrew H Thangliana pa unaupa David M Thanglianate pawhin thu an sawi.