Nurse result chhuak har hna diltute'n mak an ti
Health department hnuaia Zoram Medical College (ZMC) a contract-a thawk tur staff nurse 50 lakna tur atana interview result chu nimin thleng khan a la chhuak lo. Hna diltute chuan result chhuak har mak an tih thu an sawi.
Staff nurse lakna tur atana advertisement chu September 21, 2021 khan chhuah a ni a, dilna hun September 23 tlai dar 4 thleng hawn a ni. Mi 1,201 in dilna thehlutin, September 27-30 chhung interview buatsaih a ni a, diltu zingah inlan lo engemawzat an awm.
Hna diltu ṭhenkhat Vanglaini palaiin a biak pawhte chuan result tihchhuah a ni lawk lo chu mak an tih thu sawiin, "Hmanhmawh taka lak tura tih ni si, result a chhuak lehlawk si lo hi kan hrethiam bik lo. Result chhuah hun tura bituk lâwk erawh a awm lo," an ti.
Hna latu tura an ruatte chuan interview buatsaih zawh a nih hnuah result an peihfel har lo nia an hriat thu sawiin hna diltute chuan, "An result siam hi thuneitu lamin an pawm lo tih thawmte kan hria," an ti a, result chhuah loh chhan an hriatchian bik loh thu an sawi.