Bamboo road a tam thei ang laih a ṭul thu MP-te'n DoNER Minister hnenah an thlen

Lok Sabha MP C Lalrosanga leh Rajya Sabha MP K Vanlalvenate chuan October 2, Inrinni khan DoNER minister G Kishan Reddy chu a chenna inah an kawm.

Sorkar thuchhuah tarlan danin, chief minister Zoramthanga tirha kal Mizoram MP-te chuan DoNER Minister hnenah hian Covid-19 in India ram hmun dangte aia nasa in Mizoram a luhchilh mek thu te, Myanmar buaina avangin nitin raltlan an pun mek zel thute leh Mizoram CM ruahmanna anga Mizoram chhunga bamboo road a tam thei ang ber laih a ṭul tawh thute an thlen.

Kishan Reddy chuan Mizoram hmasawnna atan bamboo road emaw economic road siam chu thil ṭul nia a hriat thu sawiin, Mizoram CM a la sawipui tur thu MP-te hi a hrilh.

DoNER Minister chuan Prime Minister aiawhin Mizoram Chief Minister tirh te chu a lo dawnsawn thu sawiin, "Mizorama Covid-19 dona atan leh district hrang hrang hospital-te tih changtlunna atana hman turin cheng vbc 38 pek thuai a ni ang," a ti a, Mizoramah oxygen plant pahnih bun a nih tur thu leh Mizorama Covid-19 dotute ṭanpui turin Central Team tirh thuai a nih tur thu a sawi.

Myanmar aṭanga inhumhimna zawnga Mizorama châm mekte pawh Covid-19 vaccine pek vek tur an nih thu sawiin DoNER Minister chuan,"Hei hi anmahni Myanmar mite tan chauh ni loin India khua leh tuite himna atan pawh a pawimawh," a ti.