BJP candidate tur K Laldinthara CM-in Tuirial bial mipuite a vau - MBJP President

Mizoram BJP chuan nimin khan October 30, 2021-a Tuirial bial MLA by-election lo awm tura an party candidate atan an spokesperson K Lal­dinthara ruat a nih thu an puang. Candidate puang­tu MBJP president Vanlal­hmuaka chuan chief minister Zoramthanga chu Tuirial bial mipuite vauah a puh.

Vanlalhmuaka chuan tun hnai lawkah Chief Minister-in Tuirial bial mipuite a vau tih sawiin, "MNF an thlan tlin loh chuan hmasawnnain a thlen loh tur thu a sawi a ni. Chief Minister hian democracy kalphung a hre miah lo tih a lang. Hetianga by-election neih apianga ruling party bial nih loh pawi theihzia a sawi fo hi sim tawh se kan duh," a ti. 

Tun dinhmunah pawh ruling MLA emaw, Chief Minister bial ngeiah pawh opposition bial aia hmasawnna ṭha bik thleng sawi tur a awm lo tih sawiin Vanlalhmuaka chuan, "Chief Minister bial phei chu Aizawla kawng chhe tam berna a ni hialin a rinawm," a ti a, kan ram hruaitute'n mipui bum ching tawh lo se a duh thu a sawi.

MBJP President chuan K Laldinthara chu BJP candidate nimahsela, Mizoram sorkar leh Mizoram mipuite harsatna sutkian a nih theihna tura trump card kenga central-a harsatna zawng zawng Modi sorkara thlen theitu tur a nih thu sawiin, "State President leh state hruaitute nena Mizoram mamawh hrang hrangte kan hmuh theihna tur a hma la theitu tur chu BJP candidate hi a ni dawn," a ti.

Inthlan lo awm tur chu Mizo mipuite'n BJP an chhawr theihna tur a nih dawn avangin Tuirial bial mipuite an pawimawh thu sawiin Vanlalhmuaka chuan, "Mizoram hma hun, kan hma ah a awm a ni tih hriain Tuirial bial mipuite'n kan candidate an thlan tlin ngei ka beisei," a ti a, K Laldinthara kaltlangin Tuirial bial mipuite'n Mizote leh Mizoram rawng an bawl theih tur thu a sawi.