District tina RT-PCR din turin chak taka hmalak mek a ni

Central YMA hruaitute chuan Pathianni khan Health minister Dr R Lalthangliana a inah an kawm a, district tina RT-PCR laboratory din turin chak taka hmalak mek a nih thu a lo hrilh.

CYMA thuchhuah tarlan danin, YMA-in Mizoram chhungah RT-PCR lab. a tam thei ang ber din tura an ngen chungchangah Health Minister chuan district tina din tum a nih thu a lo hrilh a, "RT-PCR lab. din tura tihtur ṭulte vawi leh khata peih vek theih a nih loh rualin, chak taka hmalak mek niin, hna hmasa-ah Lunglei leh Champhai buaipui a ni," a ti.

ZMC-a Covid-19 vanga thite dahna atana kuang pek kawngah YMA chuan theihtawp an chhuah tih Health Minister hi hrilhin CYMA hruaitute chuan, "Tun dinhmunah kuang neihsa te hman zawh deuh a nih thu dawn a ni. Khawpui chhung bik branch-te chu ZMC-a Covid-19 avanga thi kan awmin kuang thlakna ken ṭhin ni se," an ti a; Aizawl pawn lama mitthi an awma hman turin ZMC-ah khawpui chhung branch remchang thei tan chuan kuang hi donate theih reng a la nih thu an sawi.

CYMA chuan sorkar pawhin Aizawl khawpui pawn lam mite kuang mamawh lo ngaihtuah se an duh thu Health Minister hi hrilhin, kuang chungchanga harsatna a awm anih chuan CYMA hruaitute hnenah ZMC lamin an thlen ṭhin turin thutlukna an siam.