Covid-19 vangin mi pasarih an thi

Covid-19 vangin nimin zing dar 4:40 aṭanga tlai dar 5 thleng khan mi pasarih an thi a, nimin tlai dar 5 thleng khan Mizorama Covid-19 vanga nunna chân chu mi 326 an tling tawh.

Nimin zing dar 4:40 khan LK Hmanga (52), Saiphai chu ZMC-ah a thi a, natna dang a nei tel. September 4-ah hri a kai tih hriat chhuah niin September 6 khan ZMC-ah dah luh a ni.

K Singliana (78), Zonuam chu zing dar 7:15 khan ZMC-ah a thi a, natna dang nei sa a ni. September 26 khan hri a kai tih hriat chhuah niin October 4 khan ZMC-ah admit a ni.

Lalhuapzauva (73), Dinthar chu nimin zing dar 8:45 khan ZMC-ah a thi. September 19 khan hri a kai tih hriat chhuah niin September 20 khan ZMC-ah dahluh a ni a, natna dang nei tel a ni.

Chhawnveli (67), Hnahthial chu nimin zing dar 8:30 khan Lunglei DCHC-ah a thi a, September 22 khan hri a kai tih hriat chhuah niin hemi ni vek hian admit a ni.

Lalremruata (46), Zemabawk chu nimin chawhma dar 11:15 khan ZMC-ah a thi a, natna dang nei sa a ni. September 9-ah hri a kai tih hriat chhuah niin September 14 khan admit a ni.

H Lallungkhami (67), Tanhril Vengthar chu nimin chawhnu dar 1:40 khan Covid-19 vangin a chenna inah a thi. Sorkar thuchhuah tarlan danin damlo chak lo sa a ni a, nimin khan an chenna inah test niin hri a kai tih hriat chhuah a ni.

Lalrochhingi (71), Kulikawn Veng chu nimin chawhnu dar 2 khan ZMC-ah a thi. October 1 khan hri a kai tih hriat chhuah niin hemi ni vek hian ZMC-ah admit nghal a ni.