KHAWTHLIR

MCC bawhchhia ziaka thehluh tur
Kolasib district election officer Dr H Lalthlangliana chuan thuchhuah siamin, October 30, 2021-a Tuirial bial by-election lo awm tura inbuatsaihnaah Kolasib district-a Model Code of Conduct (MCC) bawhchhia emaw MCC chungchanga zawhfiah duh nei tan MCC nodal officer Lal Muanpuia hnenah ziaka thehluh tur a nih thu a tarlang.

ILP hrilhfiah
Mizo Cement Mistiri Association, Serchhip district chuan Pathianni khan Serchhip Chanmari Veng YMA hall-ah Serchhipa hnamdang cement mistiri-te zinga an hotu deuhte kokhawmin, ILP-a dan an zawm tur awm hrang hrangte an hrilhfiah a, Serchhip mipuite pawh mahni sponsor loh chu chhawr lo turin an hriattir. Inkawmnaah hian ṭheka rate-ah hnamdang leh Mizo­te'n an zawm tlan tur rate an siam nghal.

Mistiri training
Covid-19 hrileng avanga phai lama hnathawk Mizorama lo haw, hna thawh tur mamawhte'n eizawnna an neih theih nana Mizoram Youth Commission-in thiam thil chi hrang hrang zirtirna (training) a ruahman zinga ni 45 awh Cement Mistiri Training chu nimin khan Lawngtlai BDO Lalṭhakima Chhangte kaihhruaiin BNRGSK Hall-ah hawn a ni a, Lawngtlai district-a mi 40-te training tura thlan an ni a, DRDA hnuaia JE (IWMP) MC Lalnunmawia leh JE (design) R Malsawmdawngliana Khawlhring, programme assistant-te'n an zirtir ang.

Tanpuina hlan
MPYCC president Dr Lalmalsawma chuan nimin khan 3rd MAP 4C tan water filter leh damdawi engemawzat a hlan. Dr Lalmalsawma chuan, "Khawvel puma kan duh loh hripui lêng karah, Kristian kan nih ang leh Mizo kan nih anga inṭanpui tawn a, in lâwm tawn tùr kan ni. He hun harsa hian thil ṭha zawk hring chhuak se ka duh hle," a ti. 3rd MAP 4C-ah hian Covid-19 vei mi panga leh enkawltu pathum an awm mek a ni.

Heroin man
Excise & Narcotics dept. leh Assam Rifle ṭangkawp chuan nimin zing khan Zonuam Veng, Aizawlah heroin gram 129 leh a neitu puh Lalngaihpuii (28) d/o Zoramliana (L), N Diltlang, tuna Zonuam Venga khawsa mek nia inchhal an man. Lalngaihpuii hi NDPS Act tlawh chhanin thubuai siamsak a ni.