October 3-ah hmarchhak state zingah Mizoramah hri kai hmuh a tam ber

Sorkar laipuiin nimin zinga Covid-19 positive report a tihchhuaha a lan danin, October 3, Pathianni khan Mizoramah hripui vei 443 hmuh chhuah a ni a, hmarchhak state-ah hri kai hmuhchhuah tam berna a ni.

Pathiannia hmarchhak state-a hri kai hmuh chhuah dan chu Assam-ah 193, Meghalaya-ah 172, Manipur-ah 167, Arunachal Pradesh-ah 32, Sikkim-ah 18, Nagaland-ah 17 leh Tripura-ah paruk a ni. Hmarchhak state-a hri kai hmuh chhuah zawng zawng 1,048 aṭanga 42.27% chu Mizorama hmuh chhuah a ni.

Tarlan tawh ṭhin angin Pathianni hian Mizoramah sample test a tlem. October 3, Pathianni khan RT-PCR hmanga sample endik a awm loh bakah Lunglei leh Khawzawl district-ah chiah TrueNAT hmanga swab sample endik a ni. Siaha, Khawzawl leh Hnahthial district-ah RAT hmanga endik an awm lo bawk.

India hmarchhak state pariat zingah Mizoram chu Pathiannia hripui vei hmuh thar tam berna a nih bakah India rama hri kai mek enkawl tamna ber a ni chhunzawm zel. Hetihlai hian Lakshadweep leh Dadar and Nagar Haveli & Daman and Diu chu India rama hri kai awm tawh lohna state an ni.

Nimin zinga sorkar laipui report tihchhuaha a lan danin Mizoramah Covid-19 vei enkawl lai (active case) 15,270 an awm a, India ramah Mizoram aia active case tamna state pathum - Kerala (1,37,630), Maharashtra (39,472) leh Tamil Nadu (16,972)-te chiah a awm. Covid-19 vei hmuh chhuah tawh zawng zawng aṭanga thi tawh zat percentage-ah erawh Mizoram chu India rama a hniam ber dawttu a ni thung.