Bru hruai kir chungchangah sorkarin Spreme Court ngaichâng

Ministry of Home Affairs (MHA) leh Mizoram sorkar chuan, Mizoram aṭanga Bru raltlan Tripura refugee camp-a awm mekte Mizorama hruai kîr chungchangah Supreme Court thupek an ngaichâng mek.

Home department-a additional secretary Lalbiakzama hnen aṭanga Vanglaini thu dawn danin, Agartala, Tripura-a MHA bultuma Mizoram leh Tripura sorkar aiawhte leh refugee camp-a Bru hruaitute ṭhutkhawm hnuhnung berah MHA chuan Bru Mizorama kîrte hnena an tih theih chin an sawi. Chumi hnuah MHA chuan Bru aiawhte chu kîr an duh leh duh loh an zâwt a, Bru hruaitute chuan an duh loh thuin an chhâng hlawm a ni.

MHA hian Bru Mizorama kîrte chu Rs. 1,30,000 bakah, kum hnih chhung thla tin Rs. 5,000 leh free ration pek an tiam a, Bru hruaitute erawh chuan chu chu an la duh tâwk lo. Mahse, MHA lam chuan hetiang bak chu an pek theih loh thu an sawi thung.

Mizoram Bru Displaced Peo­ple Forum (MBDPF) chuan Bru refugee camp-a awmte chu an awm anga awm zuitir hrih phûtin, Supreme Court-ah an zualko a; hemi chungchang hi ngaihtuah fel a nih hma chuan Bru hruai kîr tura ruahmanna awm chu bawhzui lo turin Supreme Court chuan a ti a ni.

MHA hotute chuan, Bru refu­gee camp an tlawh ṭuma an thil hmuh leh hriatte leh Bru thil phût chungchanga an ngaihdante Sup­reme Court-ah thlen ve an tum a ni.