BJP nena inzawmna neih loh a him ber ang tih ZPM-in kan rêl thlu - Duhoma

Zoram Nationalists Party (ZNP) president Lalduhoma chuan, pawl hrang hrangte thawhhona ṭangrual pawl, Zoram Peoples' Movement (ZPM) chuan BJP nena inzawmna neih loh a him bera an ngaih thu leh thawhpui an rél tih a sawi.

Lalduhoma hian nimin khan an party pisaah thu sawiin, BJP chungchanga Champhai district BJP secretary Lian­chi­thanga'n phone hmanga a biaknaa a lo record chungchang a sawifiah rualin, BJP chungchanga ZPM thutlukna a sawi a, "BJP chungchang hi May 2, 2018 khan ZPM Streering Committee-in a vawi khatna atan kan ngaihtuah a. Chutah chuan, Mizo mipuite hi BJP lakah kan fimkhur hle a ngai dawn niin kan hria a, hei vang hian ZPM chuan BJP nena inzawmna neih loh a him ber ang tih lungrual takin kan tithlu a ni," a ti.

Central BJP hotute leh Mizorama BJP hotute'n amah chu an kawm ve zauh zauh ṭhin thu sawiin Duhoma chuan, "Kei akar hi min ît derin, an party-a lut tur te pawhin min sáwm ṭhin a, kei chang lo pawh mi dang tam tak MNF leh Congress hruaitute thlengin an sawm niin ka hria. BJP-a luh hi chu kan thei lo tih chiang takin ka hrilh ṭhin," a ti a; chutiang chuan, Champhai district BJP secretary Lianchithanga pawhin amah chu a biak thu a sawi.

Party hruaitute'n an hma lama an kawng zawh tur atan kawng hrang hrang an lo dap lâwk ve ṭhin tih sawiin Lalduhoma chuan, "Thutawp siam theitu kan nih loh avangin, a rel theitu Committee hmaah kawng kan lo dapte chu thlen a nih hnuah thutawp chu Committee-in a siam ṭhin," a ti.

ZNP President chuan, BJP hotute nena kan inkawm cháng pawhin, Central-a sorkarna changtu an nih vanga inṭhian ṭhat kan duh thu te, a thu azira thawhho pawh an remtih mai theih a rin thute a sawi tih sawiin, "BJP hotute hian thawhho an duh dan engmah sawi chian an la neih loh avangin kei pawhin ZNP leh ZPM-a kan hotute hnena thlen tur engmah ka la nei lo a, ka la thlen hek lo," a ti a; BJP hotute nena an inkawm tawh dan pawh March 20, 2018-ah ZPM Val Upa Council hmaah chiang taka a report tawh thu a sawi.

Lalduhoma chuan, "Tunah chuan ZPM Streering Committee-in BJP chungchanga thutlukna a siam tâk avangin buaina tur a awm tawh lo tih hi kan mite leh Zoram mipuite ka hriattir duh a ni," a ti.