Lungleiah Mizoram Oxford kan din thar leh dawn - Joseph Lalhimpuia

Mizoram Youth Commission (MYC) chairman Joseph Lalhimpuia chuan May 2, Ni­lai­ni khan a chenna inah Lunglei district MJA-te a kâwm a; Lungleiah Mizoram Oxford an din thar leh dawn thu a sawi.

Joseph Lalhimpuia chuan, MYC hmalakna hrang hrang leh chhim lam bik tana ruahmanna an kalpui mekte a sawi a, "Mizoram mithiam hmasate lo chhuahna Lungleiah Mizoram Oxford din thar leh tuma hma lak mek a ni. Ṭhalaite khawvel zauh ang u. MYC chuan hma thar lain ke a pên mek a ni," a ti.

MYC Chairman sawi danin, Mizorama NEET, Crash Course Coaching hmasa atan Alternative Learning System (ALS) nen thawkhoin March 2018 aṭangin Lungleiah VSAT hmangin kalpui a ni a; School Based Online Coaching NEET, IIT, JEE-ahte kalpui tura ruahmanna siam mek a ni bawk.

UPSC hnuaia exam hrang hrang bakah, sorkar hnathawwk mekte leh zirlaite'n hna ṭha zawk leh duhawm zawk an hmuh theihna turte leh sipaiah awlsam zawka an luh theihna turin coaching chi hrang hrang kalpui tum a ni.

MYC ruahmannate tihlawh­tlingtu tur chu ṭhalaite an nih avangin, ṭhalai lehkha thiamte'n ngaih pawimawh nachang hriain hmang ṭangkai ngei turin rilru lo buatsaih lâwk se a duh thu Joseph Lalhimpuia chuan a sawi.