Vawk vulhtute hnena thupha chawi turin MNF ṭhalaite'n Mizoram sorkar an phût

MNF ṭhalai hruaitute chuan nimin khan Durtlanga PRRS natna vanga vawkte thite a hmunah an enfiah a; PRRS chu NLUP hnuaia vawk sem tur Myanmar aṭanga lak luh vang nia sawiin, Mizoram sorkar chu an mawh liau liau a ni tih hriaa vawk vulhtute hnena thupha cháwi turin an phût.

MNYF vice president Lalremruata Chhangte chuan, Porcine Reproductive and Respiratory Syndrome (PRRS) chu NLUP hnuaia vawkte sem tur Myanmar aṭanga lak luh aṭanga darh niin a sawi a, "Tun thlengin PRRS vanga vawk thi hi 10,000 chuang fê a ni tawh. Tun hnaiah Durtlangah PRRS vangin tual vawk 100 dáwn a thi tawh a, AH&Vety minister Pu Ngunlianchunga hi he thilah hian rang taka hma la turin kan phût," a ti.

MNYF chuan, Durtlang mipuiin vawk an vulh ṭhinte chu hrisel tak a ni ṭhin a, tun hma pawhin NLUP vawk atana lak a ni ṭhin tih tarlangin, "Kuminah Durtlanga NLUP vawk an sem aṭangin PRRS a léng ṭan a, NLUP vawk ni lo tual vawkte pawhin a kai vek avangin vawkte thi saa piang te, vawkte leh vawkpui thi leh damlote a tam hle a, vawk vulhtute an mangang hle a ni," an ti a; Congress sorkar chu PRRS natna pu darhtu NLUP vawk semah puhin, vawk vulhtute hnena zangnadawmna pe turin Mizoram sorkar an phût tih an sawi.

MNYF tarlan danin, Myanmar-a PRRS a lên avangin kum 2011 velah Mizoram sorkarin Myanmar aṭanga vawkte lak luh a khap a, chuti chung chuan a duhsak zawngte chu vawkte lak luh phalna special permit a pe a; NLUP vawkte atana Myanmar vawk lak luh a nih hnuah Mizoramah nasa takin PRRS a lêng ta a ni.