Kum 2019 chhungin Lok Adalat-ah Sum lam thubuai 5,643 chinfel a ni
Mizoram State Legal Services Authority (MSLSA) hnuaia mi/páwl pahnih inkara thubuai remna tura ngaihtuahtu Lok Adalat chuan kum 2019 chhung khan bank leh mimal pawisa inpûksak thubuai 5,643 a chingfel a, Rs. 14,00,42,804 hû a tling. Sum inpûksakna atana hman LSC zingah a tak awm lo eng emaw zat a awm.
Vanglaini palaiin a kawmnaah MSLSA member secretary Vanlalenmawia, MJS chuan, Mizoramah a pung awma mimal pawisa pûk a hluar a, inpûksak dan chi hrang hrang a awm tih a sawi a; "Pawisa an inpûksak chhan tam tak chu sumdawnna leh eizawnna bul ṭanna atan a ni," a ti a, inbum ve hrim hrimte pawh an awm thu a sawi.
Vanlalenmawia chuan, Lok Adalat-a thubuai ngaihtuah zinga ṭhenkhat chu thla khatah 10%-a pung tura pawisa inpûksakte an ni a, cheng nuai 4-5 velte an inpûksak a, an inrûl leh thei lo ṭhin tih a sawi a; a ṭhen chuan LSC an dahkham tih sawiin, "LSC dahkham zingah ṭhenawmte LSC dahkhamte pawh an awm a, a awmna ram hriat theih miah loh, thlarau LSC-te pawh sawi tur a awm," a ti.
MSLSA hotute sawi danin, bank-a loan late zingah bank-te'n ukil an rawihte hmanga loan báte an chenna ina an endik a, tihngaihna awm ngang lo nia an ngaihte an awm ṭhin a; chutiang mite chu Lok Adalat-ah koh niin, inremna siampui ṭhin a ni.
Lok Adalat-a thubuai rem tawh chu court dangah sawi buai theih a ni tawh lo a; nupa thubuai, hlawh inpe thei lo leh ram inchuhte pawh an rél tel ṭhin bawk.
A hnuaiah hian January-December, 2019 chhunga Lok Adalat-a thubuai luh dan, chin fel dan, sum zat leh a dinhmun tarlan a ni a; Pre-Litigation tih hi Lok Adalat-in an hnena lut thubuai an ngaihtuah a ni a, Post-Litigation hi court-in Lok Adalat hnena ngaihtuah tura a thawnte a ni.
Lok Adalat hian thubuai ngaihtuah dan chi thum a nei a, chungte chu - Regular Lok Adalat, Mobile Lok Adalat (a hmuna kal chilh) leh National Lok Adalat (Central aṭanga ngaihtuah tura an thawn)-te a ni.