Mizoram sorkarin NEEPCO aṭangin Power unit khat Rs. 5.18-in a lei dawn

Mizoram sorkar leh NEEPCO chu Tuirial Hydro Electric Power Project (HEP) aṭanga kawlphetha siam chhuah leina man atan unit khat Rs. 5.18 ni turin tun hnai khan an inrem a, hei hi state páwn aṭanga kawlphetha leina aiin a to. NEEPCO hian an beisei aia sum an hman tam avangin Mizoram hnenah kawlphetha an hralh tláwm thei lo.

Power & Electricity secretary H Lalengmawia hnen aṭanga thu dawn danin, NEEPCO hian Tuirial HEP siamna atan a tira senso an ruahman aia tam an sên avangin kawlphetha man an chhiar to hle a, a tìrah chuan unit khat Rs. 10.56-a lei turin an ti a ni. Mahse, Mizoram sorkar nen an inbia a, an tlahniam telh telh a, unit khat Rs. 8 leh Rs. 6-ahte tlahniam lehin, inbiakna hnuhnung berah chuan unit khat Rs. 5.18-a lei turin an inrem a ni.

Kawlphetha man an chhiar tlâwm zawk theih­na tur a nih beiseiin Mi­zo­ram sorkar chuan NEEPCO hotute chu an ruahman aia an senso a tamna phuhrûkna atan sorkar laipuia Ministry of Power-ah additional allocation dil turin thurâwn a pe a. NEEPCO hian additional allocation an dil a, Mizoram sor­karin an nawrpui bawk. Ministry of Power chuan DoNER-a dil turin thurâwn a pe a, DoNER hian cheng vbc. 133.9 a pe ta a ni.

NEEPCO hian Tuirial HEP an zo fel ngei tih fin­fiahna tur Date of Comme­rcial Operation (CoD) an la neih loh avangin Mizoram sorkarin Tuirial HEP aṭanga kawlphetha siam chhuah chu unit khat Rs. 1.79-in a lei mek a, hetiang hian thla ruk chhung bak lei theih a ni lo. Tuirial HEP leh kawlphetha lakna tur hmun Bawktlang, Kolasib inkarah inbiakpawhna a la ṭhat tâwk loh avangin NEEPCO hi CoD pek an la ni lo a, a ṭhat velah pek a ni ang.

Tuirial HEP hi sorkar laipui hnuaia awm a nih avangin Tuirial HEP aṭanga kawlphetha hralhna man bituktu tur chu Central Elec­tricity Regulatory Co­mmission (CERC) a ni a; Mizoram sorkar leh NEEPCO-in kawlphetha leina man tura an inremna unit khat Rs. 5.18 hi CERC-in a bituk hmaa lo hman lailâwk tur a ni.

NEEPCO hian CERC hnenah hian kawlphetha man bithliah tura ngenna a thlen tawh a, mahse, CERC-in a la ngaihtuah lo. NEEPCO hian kawlphe­tha man atana an duh zat CERC-ah an thlen ang a, CERC-in Mizoram sorkar ngaihdan la ve lehin, chumi hnuah kawlphetha man a bithliah ang.

Tuirial HEP aṭang hian kawlphetha megawatt 60 siam chhuah a ni dawn a, megawatt 12 chu Mi­zoramin a thlawnin an nei ang a, a bâk chu Mizoram sork arin a lei ang. Mizoram sorkarin tuna state páwn aṭanga power a leina man chu chawlhrualin unit khatah Rs. 3.55 a ni.