Kuminah Mizoramah vawk 1,029 a thi tawh

AH&Vety minister C Ngunlianchunga chuan nimin khan a pisaah AH&Vety doctor-te ko khawmin, tunlaia Mizorama Porcine Reproductive Respiratory Syndrome (PRRS) leh Classical Swine Fever (CSF) leng mek chungchang a sawipui a; department hmalakna tlangpuite leh hmalak zel dan turte an sawiho. Kumina vawk hri leng vangin Mizoramah vawk 1,029 a thi tawh tih sawi lan a ni.

AH&Vety department hotute sawi danin, kumina Mizorama vawk hri lêng mek chu Myanmar ramri dep Zokhawthar, Champhai district-ah March 17, 2018-ah hmuh ṭan a ni a; Zokhawthar aṭang hian vawk damlo 12 thisen lak niin, Disease Investigation Laboratory, Aizawla endik a nih hnuah vawk 11 chuan PRRS an vei tih March 21 khan hmuh chhuah a ni.

Nimin, May 4 thlenga Disease Investigation Laboratory-a vawk thisen endik tawh zat chu 245 niin, PRRS vei vawk 133 leh Classical Swine Fever (CSF) vei 90 vawk hmuh chhuah a ni tawh. Nimin thleng khan AH&Vety department-in PRRS leh CSF vanga vawk thi tawh zat report an dawn chu vawk 1,029 a ni a; vawk damlo mek 3,639 a awm tih report an dawng bawk.

PRRS leh CSF hi a darh zel loh nan vawk leh vawksa lak luh khapna Champhai DC-in January 27, 2018-ah a chhuah tawh a; hri a darh zel loh nan hian Champhaia district veterinary officer leh thawktu dangte'n hma an lak nghal bakah, directorate aṭang pawhin hmalak a ni.

AH&Vety Directorate hma­laknain vawk hrileng hriat a nih veleh Rapid Response Team-te'n district tinah a ṭul anga hrileng laka fimkhur tura inzirtirna public awareness an kalpui ṭan nghal. Vawk damlo a awm chuan a thisen la a, AH&Vety Directorate-a thawn tur leh ran damlote enkawla damdawi an mamawhte la nghal thuai turin an hriattir a, district tina DVO-te chu chawlhkar tin Disease Situation Report thehlut tura tih an ni bawk.

Tun ṭuma vawk hrileng avang hian sorkar laipui aṭangin assistant commissioner leh National Institute of High Security Animal Disease Laboratory (NISHAD), Bhopal aṭangin principal scientist-te an rawn kal a, April 20–23, 2018 chhung khan Aizawl leh Serchhipah vawk hrileng dinhmun an enfiah a; May 3 khan AH&Vety Directorate-ah North Eastern Regional Disease Diognostic Laboratory (NERDDL) scientist pahnih an lo kal bawk a ni.