Hawla'n BJP an thawhpui chhan a sawi ; Buddhist BJP-te hi hlauh tur an ni lo - Hawla
Congress party president Lal Thanhawla chuan, Chakma Autonomous District Council (CADC)-a BJP an thawhpui chu BJP lamin thawhho an duh vanga thawhpui an nih thu a sawi a, "Buddhist BJP-te hi hlauh tur an ni lo," a ti.
Nimina Congress Bhavan-a political session-ah thu sawiin Lal Thanhawla chuan, BJP MDC-te'n Congress party nena thawhho an duh avangin an thawhpui a, BJP MDC-te duhna chu politics-ah hnar chi a ni lo niin a sawi a, "Hindu BJP-te leh Buddhist BJP-te khaikhin chi an ni lo. Saw laia Buddhist BJP tlemtête saw hlauh tur an ni lo," tiin, CADC-a BJP-te chu ngaimawh tham an nih loh thu a sawi.
Buddhist BJP-te hlauh tur an nih loh rualin, Hindu BJP-te erawh chu hlauh tur an nia sawiin Lal Thanhawla chuan, "India ramah BJP lo lian chho zel vang hian mi tam takin zâm ta hle angah min a ngai a ni awm e. Mizo mipui hriatah ka zâm lohzia hi ka ka puang duh a ni," a ti.
Congress party President chuan, a kaihhruai sorkar chu mi pangngai tan sawi bawrhbânna tur a awm lo nia sawiin, "Chaw khawpkham lo tlemna ber state kan ni a, chaw ṭha ei tam ber state kan ni. Kan minister-te'n an department ṭheuh ṭha takin an enkawl a, sorkar hnathawkte nen lungrual takin an thawkho a ni," a ti a; tunah chuan sawhthing man pawh a sang ta a, kut hnathawktute'n sawhthing an cho mawlh mawlh ta niin a sawi bawk.
Minister Zodintluanga pawhin thu sawiin, MNF MLA ni mekte'n inthlan leh hunah an seat an hloh vek tawh dawn a, Congress party an sorkar leh ngei dawn niin a sawi a, "Kan sorkar leh dawn tichiangtu chu development hi a ni. Deptt zawng zawngah hian MNF sorkar laia hmalakna leh kan sorkar huna hmalakna hi khaikhin kan ngam a, a lêt tam takin kan thawk ṭha zawk tih ka sawi ngam. A let 500 chuangin Pu Hawla sorkarah development a lut nasa zawk," a ti.
Zodintluanga chuan, kum 2008 hnua Congress an sorkar hnua PMGSY hnuaiah project an siam ve mai theih loh chhan chu MNF sorkar laia dik lo taka thil tih leh corruption a nasat vang a nih thu sawiin, "PMGSY-ah MNF-in nasa takin corruption an ti a, chuvang chuan project siam ve mai thei lo. Kawng awmsa kawng thar angin an sawi a, corruption a tam a, CBI case an neih phah mek a ni," a ti a; tunah chuan PMGSY-a harsatna chu chinfel a ni a, kawngpui a la pawh loh khua zawng zawng pawh turin buaipui mek a nih thu a sawi.
Congress sorkarah sorkar hnathawk tam tak dah ngheh an ni a, MCS ringawt pawh an la tam hle tih sawiin Zodintluanga chuan, "Mi tam tak eizawnna nghet kan pe a ni. Heng baka sorkar ṭha hi a awm thei dawn em ni. Hmasawnna hi a zuanin a zuang a ni," a ti.