Rinawmna leh dikna kan mamawh ber - PL Liandinga

Ṭangrual pawl, Zoram Peoples' Movement (ZPM) chuan nimin khan an pisaah inkhawm an nei a; thu sawitu PL Liandinga chuan, Mizoram mamawh ber chu rinawmna leh dikna a nih thu a sawi.

PL Liandinga chuan, Mizoramin rinawmna leh dikna a mamawh ber tih sawiin, "Sorkar hmalakna hrang hrangah pawisa chuan daih ṭhin mah se, a enkawl dan a dik ṭhin loh avangin a hlawhchham ṭhin. Kan ram chhanchhuak tur hian rinawmna kan neih chuan fin leh remhriat vak a ngai lo a, kan neih sa hman dik hi hmasawnna a ni ngei ang," a ti.

ZPM chu mi bei­dawngte'n beiseina thar an neih phahna a ni tih sawiin PL Liandinga chuan, "Inthlan laia candidate-te'n an pawisa an sêng ṭeuh ṭeuh ṭhin hi eirukna kawngká a nih avangin ZPM chuan ‘Mipui buhzem’ hmangin kan bei lêt dawn," a ti a; thatchhiatna leh beidawnnaa inhruai luh aiin hna thawh leh beiseina inzirtir an tum thu a sawi.

Hunserh hmangtu Upa Zoramthanga chuan, Mizoram chu sik leh sa nuam, ruahtui ṭha, leilung ṭha a nih thu a sawi a, "Kan ram leilung hi nau hring turin a in kau reng ṭhin a. Market system leh channel mumal kan nei thei lo a, sorkar hnathawk lo leh politician ni si lo, rinawm taka vote thlak ṭhinte hi an mangang tawh tak zet. Bible keuin politics khel ila, ram i siam ang u," a ti.