Aajeevika Evam Kaushal Vikas Mela
Mizoram State Rural Livelihoods Mission (MzSRLM) chuan nimin khan Lal Thanhawla Auditorium-ah thingtlang mite hmasawnna tura inrelbâwl dan ṭha zawk zirtirna beihpui thlakna, Gram Swaraj Abhyan (GSA) hnuaiah Aajeevika Evam Kaushal Vikas Mela (Eizawnna leh thiam thil inkawhhmuhna kût) an buatsaih a; Rural Development minister R Lalzirliana khuallian a ni.
RD Minister chuan, ramin hma a sawn theih nan thingtlang mite'n hma an sawn hmasak a pawimawh tih sawiin, "Self help group (SHG) hi retheihna ûmbo tura a bul ṭanna leh hmasawnna tura rahbi hmasa ber zinga mi a ni a, SHG-te hlawhtlinna chu a sum zawnga tehin lian tham rih lo mah se, hmasawnna lian zawk leh sum tam zawk thawk chhuak tura thingtlang mite buatsaihtu a nih avangin a pawimawh em em a ni," a ti a; SHG chu mi tin tan a nih thu a sawi.
Aajeevika Evam Kaushal Vikas Mela hi RD secretary Lalhmingthanga'n a kaihruai a, khaw hrang hranga SHG member-te telin, mithiamte'n thupui pathum an zirtir a ni.