COVID-19: Mizoram dinhmun Hripui vei 60 hmuh belh a ni
November 9, Thawhṭanni khan Mizoramah Covid-19 hripui vei mi 60 hmuh chhuah a ni a, nimin khan hripui laka fihlîm tawh mi 28 chhuahtir an ni thung.
Mizoramah Covid-19 positive mi 3,156 hmuh chhuah a ni tawh a, mipa 2,367 leh hmeichhia 789 an ni. Mi 3,096 zinga mi 2,684 (85.04%) chhuahtir an ni tawh a, mi pahnih (0.06%) thi tawhin, enkawl mek mi 470 (14.90%) an awm.
November 9, Thawhṭanni khan Mizoramah swab sample 1,545 endik a ni a, Covid-19 hripui vei mi 60 an awm. Sample endikte chu ZMC-a endik 699, TrueNAT-PCR hmanga district pasariha endik 68 leh RAT hmanga district 10-a endik sample 778 an ni.
Covid-19 vei hmuh chhuah tharte chu mipa 29 leh hmeichhia 31 an ni a; ZMC laboratory-a hmuh mi 51, TrueNAT-PCR hmanga Champhaia hmuh mi pakhat leh, Rapid Antigen Test (RAT) hmanga Aizawl leh Lawngtlaia hmuh mi pariat an ni.
Nimin khan hripui laka fihlim tawh mi 28 chhuahtir an ni a; SRH-ZMC aṭangin mi 10, Durtlang BSUP CCC aṭangin 15, Lawngtlai CCC aṭangin pahnih leh Lengpui CCC aṭangin mi pakhat an chhuak. Thawhṭannia chhuak zingah nimina chhuak Vanglainia tarlan hman loh mi 18 an awm a, Thawhṭannia chhuak zawng zawng chu mi 37 an ni.
Sorkar thuchhuah tarlan danin, Covid-19 vei ZMC laboratory-a hmuh tharte chu mipa 26 leh hmeichhia 25 niin, Aizawl district-a sample lak vek an ni a; mi 14 chu state páwn aṭanga rawn lut thar niin, mi 37 chu Mizoram chhunga kái chhâwng an ni thung.
Tuikhuahtlanga mipa pali - kum 23, 25 leh 35 (pahnih), hmeichhia kum 24 mite leh, Vaitin khuaa hmeichhia kum 20 mite chu tun hnaia Shillong, Meghalaya aṭanga rawn haw an ni a; an vaiin quanrantine facility-a awm lai, symptom nei lo an ni.
Bawngkawna hmeichhia kum 47, Chanmari, Aizawla hmeichhia kum 23 leh Kawnpui mi hmeichhia kum 30-te chu missionary, Tripura aṭanga rawn haw thar, quarantine facility-a awm mek an ni a, symptom nei lo vek an ni. Ṭhuampuia mipa kum 35 chu India sipai, Sikkim aṭanga rawn haw a ni a, symptom a nei lo.
State páwn aṭanga rawn lut thar dang, Lengpuia awm mipa kum 28, 38 leh 50 mite chu CRPF mi leh sa an ni a, quarantine facility-a awm mek niin, symptom an nei lo vek. Tuivamita mipa kum 20 mi pawh state páwn aṭanga rawn lut niin, WTC industry hnuaia thawk, symptom nei lo a ni.
Mizoram chhunga kai chhawngte dinhmun chu table-ah tarlan a ni.
TrueNAT-PCR hmangin Champhai District Hospital laboratory-ah hripui vei pakhat hmuh chhuah a ni a; Ruantlang khuaa mipa kum 23, Dehradun aṭanga haw, quanrantine facility-a awm mek niin, symptom nei a nih thu, sorkar thuchhuahin a tarlang.
RAT hmangin Thawhṭanni khan Covid-19 positive pariat hmuh chhuah niin, mipa pathum leh hmeichhia panga an ni a; Aizawla mi paruk leh Lawngtlaia mi pahnih an ni. Mi pariat chu tualchhunga kái an ni a, pakhat erawh chu state páwn aṭanga haw, Mizoram University-a professor mipa kum 50, symptom nei lo a ni thung.