Covid-19 vei mi 92 awm mek Quarantine zo tawh 2 an tel
Zoram Medical College (ZMC) Covid-19 Laboratory-ah June 9, Thawhlehni zan khan Covid-19 vei mi panga hmuh chhuah leh a ni a, he thu ziahlai hian Mizoramah hripui vei mek mi 92 an awm. Tun hnaia hripui vei hmuh chhuah zingah hian inkhung hran hun (quarantine peroid) zo tawh mi pahnih an tel.
Thawhlehni (zan telin)-a AMC laboratory-a swab sample endiksak zawng zawng chu mi 669 an ni a, an zinga mi 51-in Covid-19 an vei laiin, kai ve lo mi 618 an awm.
Nimin khan mi 200 chuangte swab sample endik leh a ni a, vawiinah result hriat theih beisei a nih thu, ZMC Bulletin chuan a tarlang.
June 9 zanlaia hripui vei hmuh chhuah mi pangate hi kum 18-37 inkar, hmeichhia pali leh mipa pakhat an ni a, Maharashtra aṭanga haw mi pathum leh Delhi aṭanga haw mi pahnih an ni. Saitual district mi pahnih, Aizawl, Lawngtlai leh Serchhip district mi pakhat ṭheuh an ni.
Heti hian Mizoramah Covid-19 vei mek mi 92 awmin, mipa 48 leh hmeichhia 44 an ni a, dam tawh pakhat nen vei tawh zawng zawng chu mi 93 an ni.
Vei mek zinga mi 23 chu State Referral Hospital (SRH)-ah enkawl niin, mi dang zawng chu an district ṭheuha Covid Care Centre (CCC)-ah an awm thung.
Tun hnaia Covid-19 vei hmuh chhuah zinga quarantine facility-a khung hran hun hmang zo tawh mi pahnih tel vete chu Zarkawt leh Upper Republic Veng mi pakhat ve ve an ni.
Vanglaini thu dawn danin, quarantine hun zawh hnua Covid-19 kai hmuh chhuahte hi Aizawl khaw dáia huan pakhata khung hran ve ve an ni a; quarantine facility aṭanga an chhuah tur ní, June 7, Pathianni khan an swab sample lâk niin, June 9 zanah hripui an vei tih hriat a ni.