Virtual Anthurium Festival buatsaih Zin mite nasa takin a híp tawh - CM

Mizoram sorkar chuan nimin khan Virtual Anthurium Festival 2020 a buatsaih ṭan a, chief minister Zoramthanga'n a hawng. CM chuan, Anthurium Festival-in zin mite nasa takin a híp tawh ṭhin niin a sawi.

Virtual Anthurium Festival-ah hian zaithiamte an zai a, hnam incheina leh làmte tarlan a ni. Vawiinah chhunzawma zawh a ni ang.

Chief Minister chuan, kum 2006 aṭanga Anthurium Festival hman a nih aṭangin mipui leh khualzin mite hlut a hlawh ṭhin hle nia sawiin, "Kan ziaráng mawi tak tak pholanna ṭha tak a nih mai bakah, kan zai mite'n hlim takin mipui min àwi tawh ṭhin a, zin mite pawh nasa takin a lo híp tawh ṭhin a ni. India ramah hriat a hlawh sâwt em em a, chhim châk hnam dang an pung zel a ni," a ti.

Sorkar laipuia Ministry of Tourism-in festival hman nan kum tin Mizoram sorkarah sum a pe ṭhin tih sawiin CM Zorama chuan, "He sum hi thil dang atan hman theih a ni lo a, Mizoram tourism chawikan nan kût huaihawt ngei ngei turin min ti a ni," a ti a; sum hmang chuan Tourism department-in kût pahnih - Anthurium Festival leh Winter Festival a huaihawt ṭhin thu a sawi.

Zoramthanga chuan, kuminah state dangin festival huaihawtna tur sum an dawn loh laiin, Mizoramin a dawng a, festival hman theih a ni tih sawiin, "Kum dang angin hmang thei lo mah ila, Standard Operating Procedure sorkarin a chhuah zâwm chungin mipui tan virtual festival huaihawt a ni," a ti a; festival chu DDK, LPS leh ZONET-ah te, social media - Instagram, Facebook leh Youtube-ahte live stream-a pek chhuah a nih thu a sawi.

Tourism minister Robert Romawia Royte pawhin thu sawiin, Covid-19 boruak kara Tourism department hmalakna chi hrang hrang a sawi a, "Zin veivah leh mipui punkhawm a rem loh avangin media partner hrang hrangte leh social media kaltlangin festival hi livestream a ni," a ti.

CM Zoramthanga chuan, Anthurium chu Mizorama awm ngai lo ni ṭhin mah se, Horticulture department-in Mizoram leilung mil a ni tih an hmuh chhuah avangin Holland ram aṭangin kum 2002-ah lâk luh a nih thu a sawi a, "Eizawnna puitlingah a lo chhuak ta a. A tui mi tan leh taima taka chíng tan sum hnár ṭha tak a ni a, chhungkua châwm thei khawpin hlàwkna a tèl theih a ni," a ti.

Chief Minister sawi danin, Mizorama Anthurium tharte chu a tìrah Dubai leh Tokyo-ah thawn ṭhin a ni a, transportation-ah harsatna a awm a, an supply hneh loh êm avangin tihtawp a ni. Tunah chuan New Delhi-ah chawlhkar tin kuang 7,000 vel thawn ziah a ni a, an duh ang zat pek tur a la awm lo.

Zoramthanga chuan, sorkarin theih­tawpa hmalak tumin ruahmanna hrang hrang an chhawp tih sawiin, "Thil tam kan tih hmain Covid-19 hripuiin khawvel a chawk buai ta si a, eng mah tih hleih theih a ni ta rih lo a ni," a ti a; tourism lamah hmasawn zel turin theihtawp an chhuah zel dawn tih a sawi.

Hripui léng karah mipuite'n thuawih tak leh sorkar thuchhuak zài ngai chunga 'new normal' an pawm thiam a pawimawh nia sawiin Chief Minister chuan, "A ṭul têah lo chuan chhuah veivahte hi sim a hun tawh a ni," a ti.