Covid-19 do dan thlak dawn; Lockdown ṭul tawh loah ngai

Mizoram sorkar chuan Covid-19 do dan phung ṭhenkhat a thlak dawn a, kalphung thar tur duang tura a din State Level Expert Team on Covid-19 Management rawtnate a pawm tawh. Management Team hian lockdown puan ṭul tawh loah an ngai.

Health secretary R Lalramnghaka chuan nimin khan IPR auditorium-ah thuthar thehdarhtute kawmin, Covid-19 do dan phung ṭhenkhat thlak a nih dawn thu a sawi a, "Mipui zawh tawkin kalphung thlak hret ṭul tih a ni. Kan kaldan pangngai chu Covid-19 dona atan a sawt tawk tawh lo tih ngaihdan a lian hle. Kan nitin eizawnna tibuai lo deuh zawngin, tlema inthlandul deuh hlek ṭha tih a ni," a ti.

R Lalramnghaka chuan Covid-19 kara nundan phung kan thiam tawh tho avangin inkaihhruaina ṭhenkhat hlipin, nunphung pangngai thei ang bera nun chhoh zel beisei a nih thu sawiin, "Chumi atana rawtna siam turin September 23, 2021 khan Health Principal Director kaihhruai State Level Expert Team on Covid-19 Management din a ni," a ti a, team-te'n rawtna an siam chu sorkarin a pawm tawh thu a sawi.

70% tal RT-PCR a test tur tih chungchang sawifiahin Health Secretary chuan, "March 23, 2021 khan Ministry of Home Affairs chuan 70% tal RT-PCR a test tur an ti a, chu chu April 30 thlenga hman tura tih a ni. ICMR chuan May 4, 2021 khan inkaihhruaina ti chhuak lehin RAT chu test a awlsam avang leh result a chhuah zung zung theih avangin mass test leh thil dang ṭhenkhatah hman uar a rawt," a ti.

Management Team convener Dr F Lallianhlira chuan lockdown avangin hripui kai an tlakhniam chuan loh avangin ṭul bik tak engemaw a awm anih loh chuan lockdown puan tawh loh an rawt thu a sawi.

Team member Dr C Lalhrekima chuan Covid-19 vei dam leh zingah anxiety nei an tam thu a sawi.

Mitthi test tawh loh an rawt chungchanga zawhna chhangin Team member Dr Lalbiakkima chuan, "Covid-19 hi ka aṭanga thawk chhuah hmang chauha inkai theih a nih avangin mitthi tawhte chuan midang an kai thei tawh loa ngaih a nih avangin test kher hi ngai tawh loah kan ngai," a ti a, Covid-19 vanga thite zangnadawmna pek tura tih nen inzawmna a neih loh thu a sawi.

State Level Expert Team on Covid-19 Management-in rawtna hrang hrang a neihte hi Mizoram sorkarin pawm tawh mah se, he thuziah lai thleng hian notification tihchhuah a la nih loh avangin hman ṭan a la ni lo.

Management Team-te rawtna ṭhenkhat:
• Covid-19 vei symptoms nei lo leh nei nasa lote chu in lamah in enkawl tur a ni a, an chhungte chu covid appropriate behaviour ṭha taka zawm tura hrilh tur an ni
• Room hran leh bathroom hran nei lo home isolation ngai an awm a nih chuan an chenpuite test nghal loin, ni 10 hnuah RT-PCR emaw TrueNat hmanga test tur an ni a, symptoms nei an awm chuan RAT hmanga test nghal tur a ni thung
• Covid-19 veite enkawlna hmuna dah turte chu - khawsik sang (fahrenheit 100.4 a aia sang), ni 5 chhung khuh nasa, oxygen level 94% aia hniam, ni 5 chhung kawṭhalo, blood pressure sang, lungphu dik lo leh awma na neite an ni.
• Symptoms nei RAT hmanga negative-te chu RT-PCR hmanga test leh tur
• High risk group - raipuar, kum 60 chunglam leh natna benvawn neite chu bialtu CMO-te'n an
vil ang
• Khua/veng puma containment zone puan ti tawpin, hmun zim zawk khuahkhirh (micro containment) kalpui tur. Building khat, colony etc, micro containment zone atana puan
• Mitthite chu Covid-19 an kai leh kai loh test tawh loh tur
• Covid-19 avanga thite nihna - hming, kum, vei hun etc. tarlang tawh loin, a hlawmin ni khata thi zat tarlan tawp tur
• Vantlangah hri a darh tih hriat a nih tawh tho avangin mass testing kalpui tawh loh
• Mizoram chhunga Covid-19 veite enkawlna hmun tihchangtlun leh district hospital tin leh private hospital-a Covid-19 veite enkawlna hmun siam
• Mission Veng, ITI Veng, Melthum, Bungkawn, Bethlem Vengthlang leh Ṭhuampui Vengahte Covid-19 Kiosk siam
• State pawn aṭanga rawn lut entry point-a RAT negative, symptoms nei lo chu quarantine tawh loh tur. Negative pawh symptoms nei chu ni 5 chhung quarantine-a RT-PCR emaw TrueNat hmanga test leh tur