Sorkarin nurse a lak danah Volunteer-te an lungawi lo ; Covid-19 Volunteer 100 chuang aṭangin 9 chiah an la?
Health department hnuaia Zoram Medical College (ZMC) a contract-a thawk tur staff nurse 50 lakna tur atana interview result chu tihchhuah a ni a; result-ah hian volunteer-a nurse thawk mekte an lungawi lo a, ZMC-a volunteer nurse-te chuan lungawi lohna an lantir.
Volunteer-a nurse thawk mekte hnen aṭanga Vanglaini thudawn danin, volunteer nurse hi ZMC-ah mi 100 vel, Aizawl West CMO hnuaiah 17 vel leh Aizawl East CMO hnuaiah 20 vel an awm a ni.
Volunteer-a an thawh dawnah hna lak a awmin ngaih pawimawh an hlawh tur thu hrilh an ni chungin, contract-a nurse an lak tharah hian an hriat theihah volunteer-a thawk mek mi pakua chiah lak an ni, tih an sawi a; contract-a thawk tur lak zingah hian hna dil dawna neih ṭula tarlan nei lote pawh an awm niin volunteer-te chuan an sawi.
Hetihlai hian Directorate of Medical Education-in June 14, 2021-a hriattirna a tihchhuahah chuan 'Covid-19 enkawl tur lakte hi appreciation certificate pek an ni ang a, Mizoram sorkar hnuaia hna an zawn hunah ngaih pawimawh an ni ang' tih tarlan a ni.
Tuna volunteer nurse zingah hian Covid-19 len ṭan tirh lam aṭanga la thawkte an awm a, ṭhenkhat erawh kumina thawk ṭan leh thla hnih khat vel thawk tawhte an ni.
Post ruak 50 zawng zawng volunteer nurse-te hnawhkhah tir chu an duh ber ni mah se, an beisei ngam loa, tuna tling zat erawh an tlem lutuka an hriat thu Vanglaini hrilhin volunteer nurse-te chuan, "Nurse zir chhuak vek kan nih avangin a ngheta thawk angte thawh tho tihtir vek kan ni," an ti.
Result duh loh lantirna atan hian nimin khan ZMC-a volunteer nurse-te chu an duty-na hmun aṭanga chhuakin pawnah an ṭhukhawm. Volunteer nurse-te hian ban mai an duh a, thutlukna felfai tak erawh an la siam lo.
Nurse lakna tur atan hian September 21, 2021 khan advertisement chhuah a ni a, Sept 23 tlai dar 4 thleng dil theih a ni. Mi 1,201 in dilna thehlutin, Sept 27-30 chhung interview buatsaih a ni a, diltu zingah inlan lo eng emaw zat an awm.