Covid-19 do a nih dan dik loa ngaiin Congress-in mipui thlavang an hauh

Mizoram Pradesh Congress Committee (MPCC) chuan Mizoram sorkarin Covid-19 a do dan a dik loa an ngaih avangin nimin khan Vanapa Hall kawtah mipui thlavang hauhna hun an buatsaih a, Covid-19 avanga thite an sun nghal.

MPCC general secretary John Siamkunga kaihhruai inkhawmah MPCC treasurer Zodintluanga chuan sorkarin Covid-19 a do hneh loh avanga kalkhawm a ngai chu lungchhiat thlak a tih thu sawiin, "Sorkarin a ngaihna a hriat loh vanga mi tam takin Covid-19 avanga nunna an chan hi a pawi takzet. RT-PCR lab. din belh duh loin, test-na rintlak loh ber hmangin min enkawl a, hri kan inkaidarh a ni," a ti.

Zodintluanga chuan central sorkarin Covid-19 dona atan sum tam tak min pek thu sawiin, "Eng atan nge an hman? ZMC bak Covid-19 veite enkawlna hmun an siam loa, hmun hla tak tak aṭangin damlo phurh a ngai ṭhin. State dangah chuan district tinah an nei, kum 2 velah pawh ZMC bak tinge an siam belh theih loh?" a ti a, mipuiin kan tuar laia hripui hmanga sum siamah sorkar a puh.

Mizoram sorkarin RT-PCR khawl pakhat pawh a la lei lo nia sawiin MPCC Treasurer chuan, "Mi pek leh hawhchawp hlir an la hmang a, a zahthlak khawp mai. Test-na rintlak bera khawvelin a ngaih an ngaihtuah duh loh avangin mi tam takin nunna an chan a, a pawi takzet," a ti.

Zodintluanga chuan Mizoram sorkar chu dan leh thupek kenkawh kawngah a hlawhchham tih sawiin, "An hlawhchham avangin training nei lo task force-te kutah dan leh thupek kenkawh hna an dah a ni. Veng hrang hrang tihdan a in ang lo," a ti a, an duh reng vang ni loa, sorkar rintlak loh vanga dan leh thupek kengkawhtu task force-te'n dem an hlawh chu khawngaihthlak a tih thu a sawi.

MPCC Treasurer chuan Covid-19 do kawnga Mizoram hlawhchham chhan ber chu Health minister Dr R Lalthangliana leh Health & Family Welfare Board vice chairman Dr ZR Thiamsangate'n hmalak ngaihna an hriat loh vang a nih thu sawiin, "An pahnih hian tlawma la loin, kan tlin lo a ni tia bang ngam turin kan phut a ni. An hlawhchham vangin mi 300 chuangin nunna an chan hi a rapthlak takzet," a ti.

Thusawitu dang AMC councillor Rosiamngheta chuan thusawi thiam avangin ram leh hnamin hma a sawn ngawt thei lo tih chu Zoramthanga leh Lalduhoma aṭangin a takin Mizoram mipuiin kan hmu tih sawiin, "Kalphung thar sawi mah ila, a mihringate kalphung a hlui tlat chuan awmzia a awm lo," a ti a, Pathianin kalphung a thlak ngai loa, mi rintlak a zawn ṭhin zawk thu a sawi.

Rosiamngheta chuan MNF sorkarin phullem hmangin Covid-19 min dopui nia sawiin, "Phullem avanga Covid-19 vei dam leh erawh an la awm lo. Mahni dote hneh lo ṭhin chu MNF party-te an ni. Khawvel ram hrang hrang leh India ram state dangah chuan budget hmangin hripui leng an do laiin MNF sorkar chuan hripui veite enkawltu tur thawktu la duh si loin volunteer leh donation hmangin an do a ni," a ti.

MPCC-in Mizoram sorkarin Covid-19 a do dan a dik loh avanga mipuite thlavang hauhna an buatsaihah hian kalkhawmte chuan resolution panga an pass.

MPCC resolution pass-te :
■ Covid-19 dona kawngah hian MNF sorkar hi a hlawhchham chiang hle a, Dr R. Lalthangliana hi Health Minister a nih angin a mawh phurtu lian ber a ni. A mawhphurhna a hlen zo lo a ni tih inpawmin Health Minister a nihna aṭang hian bang rawh se. A bang duh lo a nih chuan minister-te hna chanpual siksawi theitu Chief Minister hian Mizoramin dinhmun chhe zawk a rah hma ngeiin Health Minister hi thlak rawh se.
■ MNF sorkarin sample endikna atana test-na rintlak tawk lo, RAT a hmang lui tlat leh, test na rintlak bera ngaih RT-PCR laboratory a do tlat hi Mizoramin Covid-19 a do hlawhchham nachhan lian berah kan ngai. Lunglei mai bakah, district dang zawng zawngah thla 2 chhungin RT-PCR lab. hi din vek rawh se.
■ Mizoram mipui, kohhran leh NGO-te hian hripui dona kawngah sorkar kan thlawp ṭha tawk a, chuvangin, MNF sorkarin hripui a do hlawhchham chhanah, inphen nan kohhran, mipui leh NGO-te hmang tawh suh se.
■ Mizoramin Covid-19 vei na zualte enkawlna, Covid Designated Hospital pakhat, Congress ministry liamtain a din State Referral Hospital, Falkawn chauh kan nei reng mai hi a mak kan ti a, nunna tam tak chhan hman a nih loh phah hi a pawi kan ti. MNF sorkar hian thla 2 chhung ngeiin district tinah Covid Designated Hospital hi siam belh rawh se.
■ Covid-19 leh lockdown vanga harsatna tawk chhungkaw sang tam takte chhawmdawlna kawnga MNF sorkarin budget aṭanga ruahmanna a siam duh miah lo hi a pawi kan ti. Chhawmdawlna tur ruahmanna ṭha tak siam thuai rawh se.