ZPM Ṭhalaiin NECS kawng siam endik turin sorkar an phut

ZPM Ṭhalai chuan nimin khan Aizawl Press Club-ah thuthar thehdarhtute an kawm a; NECS in Phullen leh Zawngin inkar kawng siam hna an thawh mek chu endik turin sorkar an phut.

ZPM Ṭhalai senior vice president Dr C Lalrammawia chuan Phullen leh Zawngin inkar kawng km. 12.36 a thui NECS in an siam chu dawngdah taka thawh nia an hriat thu a sawi a,"September 28, 2021 khan a hmunah kalin kan enfiah a, he kawng hi October 27, 2017 aṭang khan PMGSY sum nuai 879.16 hmanga siam ṭan a ni a, October 27, 2019-a zawh tura ruahman a ni. Zawh hun tur hi a pelh viau hnu pawhin hna thawh tur a la tam hle tih kan hmu," a ti a, kawng chhawrtu khaw mipui zah lohnaa an ngaih thu a sawi.

Excavator-in kopang lei a hai thlak, kawnga chhah taka phah a nih hnua road roller chil muk tir a nih thu sawiin Dr C Lalrammawia chuan,"Hei hi kawng siam dan kan la hriat ngai loh a ni a, kawng siam a chhiat thuai theihna tur niin kan ngai. Sorkara thuneihtute rang taka enfiah tur leh, hei hi kawng siam dan tur a ni reng em? Siam dan tur a nih loh chuan siamṭhat tir a ni dawn em, tih mipuiah chhanna pe turin kan phût. Kawng siamnaa inhlawha thawkte hlawh hun rei tak bat sak tawh chu pe thuai turin NECS kan phut a ni," a ti.

ZPM Ṭhalai chuan MNF chu sorkarna an siam ṭan tirhin an kawng siamte an uanpui emaw tih mai turin an awm tih an sawi a," Mizoram Legislative Assembly-ah pawh private resolution hial put luh a pass a ni a, PWD changtu chief minister pu Zoramthanga fakna pawh a ri ring hle," an ti a; tuna Mizoram hmun hrang hranga kawng chhia chu ruah sur, lung ṭha tawk lo, contractor leh engineer-te chhuanlama hmang loa a mawhphurhnaa la ngam turin PWD Minister chu an phut a ni.