Mizoram pumah Covid-19 vaccine dose 11,34,309 pe chhuak tawh

Mizorama Covid-19 vaccine pekchhuah kawnga thuneitu 'State Task Force for Covid-19 Vaccination' chu an chairman R Lalramnghaka, Health secretary hoin nimin khan Secretariat conference hall-ah an ṭhu a, Mizoram pumah vaccine dose 11,34,309 pekchhuah a ni tawh tih an tarlang.

Meeting-a tarlan a nih danin, Mizorama vaccine pek tawh dose 11,34,309 aṭanga 6,82,964 chu dose khatna la an ni a, full dose la tawh mi 4,51,345 an awm. Electoral roll thar ber aṭanga chhutin kum 18 chunglam vaccine pekchhuah ngai mi 7,75,106 an awm a, heng zinga 88.1% in dose khatna an la.

Mizorama full dose pe kim thei tura dose mamawh zat chu 8,67,247 a ni a, tunah hian vaccine dose 5,34,500 kawl mek niin mamawh belhna hi a tahtawla sorkar laipui aṭanga dawn ṭhin a ni. Khum bet a na leh in chhuahsan thei lote survey neih mek zel a ni a, district pathum aṭangin list dawn tawh niin mobile team-te'n an chenna in-ah kalchilhin vaccine an pe dawn a ni.

Sorkar laipui aṭanga September thlaa ‘Report of the Technical Group on Population Projections for India and its States/UTs 2100 – 2046) behchhana vaccine pek tur zat list siam ṭhatna tur hriattirna dawn a ni a, he projections ang hian Mizorama vaccine pek ngai chu mi 8,67,000 (kum 18 – 44 mi 5,72,000, kum 45 – 59 mi 1,87,000 leh kum 60 chunglam mi 1,08,000) an awm. Electoral roll anga a tira pek tura chhinchhiah zat aiin mi 91,894 in an pung a ni.