Minister-in video conference system hlan

Japan International Cooperation Agency (JICA) Covid Aid hnuaiah nimin khan Irrigation & Water Resources (IWR) minister C Lalrinsanga chuan sorkar department pali hnenah video conference system set 25 a sem.

C Lalrinsanga chuan JICA kaltlanga IWRD hmalakna chu lawmawm a tih thu a sawi a, "Japan mithiamte'n Mizoram chhunga hma an lakna hrang hrang zingah technology transfer hi a pawimawh lai leh kan mamawh lai a ni," a ti a, video conferencing system-te chu state leh inter-district inlaichhinna ti ṭha tu atana hmang turin a dawngtu department-te a chah.

Information technology chu kuthnathawktute hmasawnna thlentu ni zel se a duh thu sawiin C Lalrinsanga chuan,"Sorkar pawhin mobile app hmanga thlai chi ṭha (quality seeds) chungchang inzirtirna te, thlai chi theh hun leh pest management inzirtirna leh thlai eichhetu, pest hriat theihna leh mithiamte rawn theihna kawngah hma a la a, tih hmasawn zel pawh a tum a ni," a ti.

Minister hian video conferencing system set hi Agriculture department hnenah pakua, Horticulture department hnenah pasarih, Land Resources, Soil & Water Conservation department hnenah panga leh Irrigation & Water Resources department hnenah pali a hlan. Set pakhat-ah hian smart TV, camera, CPU leh microphone a awm a ni.