'Electoral Politics in Mizoram' tlangzarh

Assembly speaker Lalrinliana Sailo chuan nimin khan Mamit College-a assistant professor Dr Joseph C Lalremruata lehkhabu ziah 'Electoral Politics in Mizoram (1972-2019)' tih chu Assembly Secretariat common recess room-ah a tlangzarh.

Lalrinliana Sailo chuan ram vei tak tak a ṭul tih sawiin, "Mizoram hmasawnna tur hian budget siam kawngah leh a bulthuma ruahmanna duan (planning)-ah hma kan sawn a ngai hle. Ram hmasawnna turin mi tute pawhin mawh kan phur tih hriaa, ram kan vei tak tak a ṭul a ni," a ti a, Electoral Politics in Mizoram (1972-2019) chu lehkhabu rotling, zirlaite chhawr ṭangkai theih tur leh zirbingna kalpui duhte tan pawha chhenfakawm tur a nih thu a sawi.