KHAWTHLIR

Thisen pe
Hrangbana College NSS Unit chuan nimin khan an college hall-ah thisen pek an huaihawt a, Civil Hospital, Aizawl tan thisen unit 65 an pe a, a petute hi mipa 61 leh hmeichhia pali an ni. Vawiin leh naktukah pek chhunzawm leh an tum a ni.

MCC training
October 30, 2021 a Tuirial biala by-election lo awm tur a tan nimin khan Model Code of Conduct (MCC) nodal officer Lalmuan Puia kaihhruaiin Kolasib DC conference hall-ah MCC inzirtirna buatsaih a ni a; sector magistrate, magistrate for flying squad and static surveillance team, video surveillance team, video viewing team leh liaison officer to election observer-te an tel.

National seminar
Khawzawl College multipurpose hall-ah nimin khan District Election Office leh Khawzawl College political science department chuan ‘National Seminar on Electoral Literacy and Participation’ an buatsaih a, DC CC Lalchhuangkima'n a hmanpui. He hunah hian Khawzawl College, Champhai College leh Saitual College-a sawm bik te'n electoral literacy kaihhnawih thupui pasarih an zirtir a ni.

Proforma declaration
Kolasib district election officer Dr H Lalthlangliana chuan nimin khan Tuirial bial by-election neih tura lehkhachhutna dawr (printing press) neitute hriat tur a ti chhuak a; posters, pamphlets etc. chhut tur neite chu Kolasib DEO hnenah an lehkhachhutna dawr tihchianna proforma declaration thehlut turin a hriattir.

Heroin man
Excise & Narcotics department leh Assam Rifle ṭangkawp chuan Thawhṭanni zan dar 6:15 khan Falkland leh Thuampui peng, Aizawlah heroin gram 283 leh a neitu nia puh mi pathum - Lalramhlimpuii (33) d/oNgurzama, Champhai Kanan Veng; Lalhunmuani (45) d/o SL Thanga, Zobawk, Lunglei district, tuna Bawngkawn Hmar venga khawsa mek leh Lalpeklawma (26) s/o Lalsawmliana, Champhai Vengthlang North nia inchhalte an man.