COVID-19: Mizoram dinhmun ; Hri vei 1,681 hmuh belh
October 4, Thawhṭanni khan Mizoramah Covid-19 vei mi 1,681 hmuh chhuah a ni a, India rama hri kai hmuhchhuah tam lamah pathumna a ni. Nimin khan tlai dar 5 thlengin hripui vangin mi paruk an thi a, hripui vei dam tawh mi 831 chhuahtir an ni.
Covid-19 vei hmuh thar mi 1,681-te chu mipa 789 leh hmeichhia 892 an ni a; ZMC laboratory-a hmuh 679 (40.39%), TrueNAT hmanga hmuh 52 (3.09%), RAT hmanga hmuh 904 (53.77%) leh Fluorescent Immunoassay (FIA) hmanga hmuh 46 (2.73%) an ni.
IDSP record angin, Mizoramah Covid-19 vei 99,856 hmuh chhuah a ni tawh a, mipa 49,198 leh hmeichhia 50,658 an ni. Nimin tlai dar 5 thleng khan mi 84,450 (84.57%) chhuahtir an ni tawh a, mi 331 (0.33%) thi tawhin, enkawl mek mi 15,075 (15.10%) an awm.
October 4, Thawh-ṭannia hripui vei hmuh thar mi 1,681-te chu symptom nei 691 leh nei lo 990 an ni. Kum 2011 chhiarpui aṭanga chhûtin Mizorama Covid-19 vei hmuh tawh 99,856 chu mi 1,000 zelah hripui vei mi 89 an awm ang a ni a; mi 1,00,000 zela Covid-19 vangin mi 29 an thi tawh ang a ni bawk.
Nimin khan tlai dar 5 thlengin hripui vei dam tawh mi 831 chhuahtir an ni a; Aizawl district-ah mi 351, Champhai district-ah mi 264, Lawngtlai district-ah mi 79, Serchhip district-ah 52, Kolasib district-ah mi 47, Siaha district-ah 21, Hnahthial district-ah mi 4, Mamit leh Lunglei district-ah 3 ve ve leh Saitual district-ah pahnih an chhuak.
Sorkar laipuiin nimin zinga Covid-19 report a tarlan danin Mizoram chu October 4, Thawhṭannia India rama hri vei hmuh chhuah tam lamah pathumna a ni a, Mizoram aia hri vei hmuh chhuah tamna te chu Kerala (8,850) leh Maharashtra (3,165) te chiah an ni.
Hmarchhak state zingah Mizoram chu hri vei hmuhchhuah tam berna a ni leh a; October 4, Thawhṭanni khan Assam-ah hri vei 333, Meghalaya-ah 112, Manipur-ah 100, Arunachal Pradesh-ah 27, Tripura-ah 14, Sikkim-ah 12 leh Nagaland-ah 10 hmuh chhuah a ni. Thawhṭannia hmarchhak state-a hri vei hmuh chhuah zawng zawng 2,289 aṭanga Mizorama hmuh chhuah 1,681 chu 73.43% a tling.
