Mizoramin Indian Roads Congress a thleng

Indian Roads Congress (IRC) 215th Mid Term Council Meeting, ni hnih awh chu May 4, Zirtawpni khan Mizoram University audi­torium-ah Union minister of state for Road Transports & High­ways Mansukh L Mandaviya-a'n a hawng a, Inrinni khan a ṭiak.

Mansuk L Mandaviya chuan, kawngpui ṭhain zawi zawiin thil ṭha a thlen a, hmasawnna a awm ṭhin tih sawiin, "India ramin ṭâm leh retheihna nasa tak awm ṭhin tihbo nan kawng ṭha a mamawh a, ram hmasawn nan leh thintlang mite harsatna aṭanga khai chhuah nante leh ram leh ram inkara inunauna thlen tu atan kawng ṭha neih mâkmawh a ni," a ti a; Silchar aṭanga Tuipang kawng siam nan cheng vbc. 6,000 pek a tiam.

Chemical & Fertilizers minister ni bawk Mansuk L Mandaviya chuan, a department chan ni mah se, fertlilizer hman a thlawp loh thu a sawi a, "Ka department chan hi Chemical & Fertilizers ni mah se, Mizoram hi organic state ni turin ka duh," a ti.

Mizoram PWD minister Lal Thanzara pawhin thu sawiin, inkalpawh tawnna atan kawng a pawimawh tih a sawi a, "Ram hmasawnna atan kawng hian dinhmun pawimawh tak a luah a, mipuite retheihna ata khaichhuahna atan pawh a ṭangkai. A bikin hmun kilkhawr leh state ṭhang mek Mizoram ang tan kawng ṭha neih a pawimawh lehzual," a ti.

Lal Thanzara chuan, Mizoram chu tláng ram leh ruahtui tlak tamna hmun a nih thu sawiin, "Ruahtui a tlak rei avangin hna thawhna hun a tlem a, kawng siamna atana lung hman turah pawh harsatna kan tâwk a ni," a ti a; IRC-a mithiamte'n Mizo­rama tana ṭha tura an ngaih pawimawh a ṭul thu sawi.

Mizoram chu state tê, hma­sawnna kawng zawh mek a nih thu sawiin PWD Minister chuan, "Mizoramah hian khaw 800 vel a awm a, hengte hi PMGSY hmangin kawngin a tlawh vek tawh. Railways lama inkalpawhna la buaipui mek a nih avangin Mizoram ang tan chuan kawng hi economy lama hmasawnna atan thil pawimawh ber a la ni hrih," a ti.

IRC president Krishna Reddy chuan, IRC hmangin mithiam hrang hrangte'n highway lama hmasawnna atan an thil hriatte an inhrilh tawn ṭhin thu sawiin, "IRC hian kawng ṭha zawk siam a nih theihna atana thil pawimawh tarlanna lehkhabu 250 chuang a chhuah tawh a ni," a ti a; kawng siamah hmasawnna a awm zel theihna atan theihtawp an chhuah thu a sawi.

IRC President sawi danin, lirtheia chetsualnain economy-ah thui tak nghawng a nei a, mithiamte chhût danin, growth domestic product aṭanga chhûtin 3% vel lirtheia chetsualnain a nghawng a ni. Kawng siamna atana DPR siam dawnah leh kawng siam hna thawh dawnah himna (road safety) ngaihtuah tel zel tur a ni a; Karnataka-ah chuan kawng siamna tur DPR-ah road safety an dah pawimawh a, chetsualna a tlakhniam phahah an ngai.

Indian Roads Congress-ah hian India ram state hrang hranga kawng enkawltu te, contractor-te leh mithiam hrang hrangte an tel a; kawng enkawl kawnga harsatna awm te, a sutkian dan turte leh hmasawnna turte an sawiho ṭhin.

IRC hi Mizoramin ṭum thum a thlenna a ni a, kum 1997 leh 2008 khan a lo thleng tawh a ni.