MHA Joint Secretary rawtna siamah Mizoram sorkarin chhanna a thawn lo

Ministry of Home Affairs (MHA) joint secretary Satyendra Garg-a'n, Mizoram leh Assam ramri leh Inner Line Reserved Forest (ILRF) enfiah dan tura rawtna pahnih a neih chungchanga an ngaihdan hrilh leh tura a tih chu Mizoram sorkarin a chháng lo.

April 21, 2018-a Silchar Airport-a Satyendra Garg hoa Mizoram leh Assam aiawhte inbiak ṭumin Satyendra Garg chuan rawtna pahnih a siam a; chungte chu - Survey of India-in constitutional boundary a siam aṭanga teha Assam leh Mizoram lam a hlat zawng inanga dan loa thil tih a awm leh awm loh endik leh, ILRF sq.mile 509 huam chhunga dan loa thil tih a awm leh awm loh sorkar laipui endiktir a ni.

Satyendra Garg hian rawtna a siam chungchangah Mizoram leh Assam aiawhte chu an ngaihdan ni thum chhunga hrilh turin a hrilh.

Hetih lai hian, Inrinni-a Aizawl Press Club-a thuthar thehdarhtute an kawmnaah MZP president L Ramdinliana Renthlei chuan, Mizoram sorkarin Satyendra Garg rawtna chungchangah Mizoram sorkarin chhanna a thawn loh thu a sawi.

MZP President sawi danin, Mizoram team-te chuan inbiakna neih hnuah Home Secretary biak an tum a, a awm loh avangin Home Additional Secretary an hmu a ni. Home Additional Secretary chuan Chief Minister hoa sawiho hnuah chhànna thawn a rawt a, CM-ah appointment pawh a lo dil tur thu a sawi a, mahse, nimin thleng khan CM chu an la hmu lo.

Zawhna chhangin L Ramdinliana Renthlei chuan, ramri chungchanga Mizoram sorkar hmalakna an duhkhawp loh thu sawiin, "Hmalakna an neih pawh kan hre lo. Chuvangin, Zophaia Zofate Chawlhbûk sa turin kan inbuatsaih leh mek a ni," a ti.