KHAWTHLIR

Mother's Day
Mizorama Salvation Army corps leh society hrang hrangte chuan nimin khan an inkhawmnaah Mother's Day (Nute Ni) an hmang a, he ni pual hian nute hnenah chawimawina leh zahna thilpek an pe. Mother's Day hi May Pathianni vawi hnihnaah hman ṭhin a ni a, kuminah hian May Pathianni hmasa bera hmang an awm a, May 13-a hman tum an awm bawk.

Thisen pe
Dinthar Branch KṬP chuan May 5, Inrinni khan Aizawl Civil Hospital tan thisen unit 41 an pe a, a petute mipa 38 leh hmeichhia pathum an ni. Leitan Ramthar Branch KṬP pawhin an kohran silver jubille pualin Synod Hospital tan thisen unit 15 an pe a, a petute mipa 12 leh hmeichhia pathum an ni.

CM-in dem
Chief minister Lal Thanhawla chuan, April 28, 2018-a R Dengṭhuama Multipurpose Hall-a 26th. Mini National Volleyball Championship khelh zawha champion Manipur skipper Sakil Chesam kutthlaktu chu na takin a dem a; kutthlaktu chu mana hrem ngei ni se a duh thu a sawi. Sorkar thuchhuah tarlan danin, Sakil Chesam-a kutthlak a ni chu Mizoram tan zah­thlak a tih thu a sawi.

Ganja man
Excise & Narcotics department-a Anti-Narcotics Squad chuan May 5, Inrinni zing dar 9:30 khan Chanmari, Aizawlah ganja kg. 13 leh a neitua puh F Lalrinthanga (45) s/o H Dengbuaia, Chanmari, Aizawl nia inchhál an man. May 4, Zirtawpni tlai dar 6:30 vel khan Muthi kawngah ganja kg. 28 leh a neitua puh Nangsonliana (30) s/o CK Thanga, NE Tlangnuam (Muthia khawsa mek) nia inchhál an man bawk.

Vawk enfiah
AH&Vety department doctor-te chu Inrinni khan Lengpuiah kalin, tunlai vawk hri lêng avangin Lengpui khaw dinhmun an zir a, vawkte an endik. Very doctor-te hian Lengpui khawtlang hruaitute an kâwm a, vawk eng emaw zat thisen endik turin an la a, damdawi an pe bawk.

Kawng hawng
Zuangtui 132 kv power sub-station pêng aṭanga Bawngkawn Hmarveng (Helipad) chung pawhna kawng R Lalrinawma Road chu Inrinni khan bialtu MLA R Lalrinawma'n a hawng. Kawng hi metre 310-a thui a ni a, bialtu MLA fund Rs. 7,00,000 hmanga siam a ni.