CADC CEM Shanti Jiban Chakma-a'n Executive Member tur pasarihte a puang

Chakma Autonomous District Council (CADC)-ah Bharatia Janata Party (BJP) leh Indian National Congress (INC)-te'n May 4, 2018 khan sorkar inṭawm an siam a; chief executive member (CEM) thar Shanti Jiban Chakma chuan May 5, Inrinni khan executive member (EM) tur mi pasarih a puang nghal.

CADC-ah hian MDC atana thlan thar mi 19-te chu May 4 khan Chawngte-ah ṭhukhawmin, protem chairman Hiranand Tongchongya-in a kaihruai a; CADC chairman tur thlan niin, Vaseitlang bialtu MDC Buddha Lila Chakma (INC) chu chairman atan thlan a ni.

Chairman thlannaah hian BJP leh INC thawh dunna United Legislature Party (ULP) MDC 10-te chuan Buddha Lila Chakma an vote a, MNF MDC pariatte chuan an candidate H Amaresh Chakma an vote thung.

May 4 vêk khan Lawngtlai DC N Chakhai chuan Chawngte-a CADC Art & Culture Hall-ah CEM atan Shanti Jiban Chakma (BJP) chu rinawmna thu tiamtirin a la lut a, ULP sorkar thar din a ni. Shanti Jiban Chakma hi Chhotapansury bial aṭangin BJP ticket-a thlan tlin a ni a, CEM 12-na a ni.

CEM atana lak luh a nih hnuah Shanti Jiban Chakma chuan, BJP-in CADC inthlana an thutiamte chu bawhzui vek a nih tur thu sawiin, "Group A leh B hna lak reng rengah duhsak bik leh inthliar hranna awm loin dan ang taka dik taka kalpui a ni dawn a, hemi nemngheh nan hian Independent Recruitment Board din nghal a ni ang," a ti a; zirna, kawngpui leh corruption tihbote an ngaih pawimawh tur thu a sawi bawk.

CEM Shanti Jiban Chakma hian Inrinni khan EM turte a puang a; EM atan hian BJP MDC panga zinga pali leh INC MDC paruk zinga pathum a dah.

EM atana ruatte chu BJP aṭangin Hiranand Tongchangya, Sanjeev Chakma, Anil Kanti Chakma leh Kusum Lota te an ni a; Congress party aṭangin Burbon Kumar Chakma, Onish Moy Chakma leh Mohan Chakma te an ni.

CADC EM atana ruatte hi Governor pawmpui turin Aizawlah thawn a ni tawh a, Governor-in a pawm hnuah rinawmna thu tiamtira lak luh an ni ang.

Tarlan tawh angin, April 20, 2018-a CADC inthlanpui vawi 10-naah khan MDC bial 20 zinga 19-ah inthlan a ni a; MNF-in seat pariat, INC-in seat paruk leh BJP-in seat panga an la a ni.