Kawng siamna tur an hman dan hi a dik lo - Union Road Transport Minister
Minister of State for Road Transport & Highway Mansuk L Mandaviya chuan sorkar laipuiin kawng siamna atana a pek Mizoram sorkarin a hman danah thil dik lo a awm ngeia a hriat thu a sawi.
Mansuk L Mandaviya hian Inrinni khan Mizoram BJP pisa-ah thu sawiin, sorkar laipuiin kawng siamna atan Mizoram sorkar hnenah sum tam tak a pek thu sawiin, "Central-in pawisa tamtak kan pe a, nimahsela kawng ṭha lai awm mang lo. Inthlan dawn chauhah kawng siam ṭhin a ni a, a hming maiin siam a ni. Kan sum pek ang hian siam se chuan Mizoram kawngte hi a chhe mai mai dawn lo," a ti.
Congress sorkarin kawng an ngaihthah chu Mizo mipuite tan a pawi thu sawiin Union Minister chuan, kawng an siamṭhat duh lohna chhan pakhat awm thei chu central-a BJP sorkar chawimawinaah an ngai nia a lan thu a sawi.
Mansuk L Mandaviya chuan CADC-a BJP kaihhruai sorkar din a ni chu lawmawm a tih thu sawiin, "He inthlan a thil mak tak pakhat chu Congress MDC aṭanga thlan tlinten United Legislature Party din a, CADC a BJP sorkar siam anih theihna tur a min thlawp tlat leh an party hming lang loa unconditional support min pe hi a ni," a ti.
India ram hmun ṭhenkhat ah pawh Congress MLA tam takin Pu Modi kaihhruai sorkar leh party-ah rinna an nghah avangin an lo chhuahsan fo tawh thu sawiin Mansuk L Mandaviya chuan, "Congress kulhpui ni ṭhin CADC-a keinin kan sawm hmasak vang pawh ni loa, Congress MDC te thlawpna (support) kan dawng leh BJP sorkara rinna an nghahna hian Mizoramah pawh Congress-ah mipuiin rinna an nei tawh lo tih a ti lang," a ti a, BJP kaihruaina ṭha ti apiangte chu tu party pawh nise an pawm theih thu a sawi.