Covid-19 kai awm belh zel mah se, Ni tin mamawh lâk luh a harsa lo
Food, Civil Supplies & Consumer Affairs (FCSCA) department chuan, India ramah Covid-19 hripui vei pung zel mah se, mipui ni tin mamawh - buhfai, eirawngbawlna gas leh tuialhthei lak luhnaah harsatna a awm loh thu a tarlang a, "Tun dinhmunah mipui tan thlaphànna tur a awm lo," an ti.
Vanglaini palai zawhna chhangin FCSCA secretary H Rochungnunga chuan, Mizoramin thla khat atan buhfai quintal 1,02,000 vel a mamawh tih a sawi a, "Tunah hian FCSCA kudamah quintal 2,40,000 a awm a, FCI hnena a man kan pek tawh, FCI kudama la awm quintal 1,08,500 a la awm bawk," tiin, inkharkhip vangin thlaphànna tur a awm loh thu a sawi.
HL Rochungnunga chuan, Badarpur leh Lumding inkarah rél kawng a chhiat avangin buhfai lâk luh theih a ni rih lo tih sawiin, "Railways lam chuan rél kawng hi June 14 velah siamṭhat theih an beisei. An beisei hunah hian siamṭha thei lo pawh ni se, June thla chhunga an siamṭhat hman chuan harsatna a awm lo ang. Tuna kan neih sa hian thla thum chhung chu min daih a ni," a ti.
FCSCA Secretary chuan, eirawngbawlna gas phur truck 38-in June 9, Thawhlehni zan dar 6 leh June 10 zing dar 6 inkarah Vairengte checkgate an paltlang thu sawiin, "Truck 38 hian gas bûr 11,600 vel an phur tura beisei a ni. Gas lâk luhna kawngah harsatna kan tâwk lo," a ti a, mamawh ang zat lak tur a awm reng thu a sawi.
Petrol leh diesel lâk luhnaah pawh harsatna an tawh loh thu sawiin FCSCA Secretary chuan, "Inkharkhip lai phei chuan mamawh a tlem lehzual a, tun dinhmunah chuan harsatna a awmin kan ring lo," a ti.