Mistiri-te'n Rs. 800 an inchhiar

Mizoram Mistiri Association (MMA) chuan nimin khan Aizawl Press Club-ah thuthar theh­darhtute an kâwm a; kumina International Labour Day, May 1 aṭangin mistiri hlawh chu ni khatah Rs. 800 (minimum) a nih thu an puang.

MMA president Vanlalhriata chuan, tunlai thil man sang vang leh pawisa hlutna tlahniam zel vangin mistiri hlawh chu ni khatah Rs. 800-ah an tihsân thu a sawi a, "Mistiri-te'n an hnathawhna atana an mamawh tlangpui hmanrua an nei tur a ni a, a nei lote chuan rate kan bituk hi an zawm ve thei lo ang. A chhawrtute'n misitiri hmanrua leisak loh ni se, kan sum a tihek em em a ni," a ti.

MMA hruaitute sawi danin, mistiri-te hi ni khat­ah darkar 8 (zing dar 9 aṭanga tlai dar 5) thawk tura ngaih an ni a, chumi bak an thawh chuan an hlawh chu darkar khatah Rs. 200 zela tihsan tur a ni.

Misitiri hna chu hna zahawm a nih thu sawiin MMA hruaitute chuan, "A chhawrtute'n an dikna chanvo kan zah tur a ni. Chhiahhlawh leh sal chhawrin kan chhawr tur a ni lo. Mistiri-te pawh rinawm leh taima takin an thawk tur a ni. Mistiri leh a chhawrtute'n hlawh chungchang an inbe fel hmasa tur a ni a, inbiakfelna chu MMA chuan tihbuai kan tum lo," an ti.

Zawhna chhangin MMA hruaitute chuan, Aizawl City Joint Local Council (ACJLC) lamin mistiri ni khat hlawh atan Rs. 700 bituk mah se, zawm an tum loh thu an sawi a, "ACJLC lam hian min rawn be lem lo. Kan rate tur hi General Assembly-a pass a nih avangin hetiang hian kan kal ang," an ti a; inbiakremna azirin mistiri rate hi ni khatah Rs. 800 ai pawha sang thei a nih thu an sawi.

MMA hi July 30, 2017 khan Aizawl khawpuia veng pasariha mistiri 335 kalkhawmin an din a ni a, tun dinhmunah branch 35-ah member 2,500 vel an awm a ni.