Tualthattu dam chhung táng dawn

Vanlalfela, Khawzawl Zuchhip Veng thattu, Kumar Subha chu dam chhung táng turin nimin khan Champhai addi­tional session judge R Vanlal­vena'n thutlukna a siam.

Khawzawl Police hnen aṭanga thu dawn danin, Kumar Subha hi Khuailui Zauh, Khawzawl ramah amahin a awm a, August 2014 khan Vanlalfela leh a ṭhiante pahnih chu Khuailuiah thing tuah tur lakhawmin an inhlawh a, Kumar Subha thlámah hian an riak ve a ni.

A zan khatnaah Vanlalfela leh Kumar Subha chu an inhnial buai deuh a, buaina lian tham erawh a chhuak lo. A tûk zanah inhauh buaina pawh an neih loh laiin, Kumar Subha chuan Vanlalfela chu a nghawngah chempuiin a sât a, Vanlalfela chu a thi nghal a ni.

He thil thleng chung­changah hian Khaw­zawl Police Station-ah FIR thehluh a ni a, sub-inspector JH Sang­hmingthanga'n chhuiin, Kumar Subha chuan tual a that ngei tih finfiahna a hmu a, Court chuan dam chhung táng turin a hrem ta a ni.