Tuirini lei chim chhan la chhui zo lo

Sesawng leh Khawruhlian inkara Tuirini lei chim chhan chhui chiang tura din Magisterial Inquiry, Aizawl DC Dr A Muthamma kaihhruai chuan lei chim chhan an la chhui zo lo a, hun tiam chhunga chhui zawh hman an inbeisei.

Vanglaini palai zawhna chhangin lei chhim chhan chhuitute chuan, lei chimna hmunah kalin thil awm dan an enfiah tawh thu an sawi a, "Thu zawhfiah ngai ang ang - PWD engineer te, lei chim vanga hliamte leh Sesawng khawtlang hruaitute thu kan zawtfiah tawh. Hun tiam chhunga report thehluh hman ngei kan inbeisei," an ti.

Thu dawn danin, Tuirini lei chim chungchangah hian technical thil zir chiang turin Aizawl DC chuan Indian Institute of Technology (IIT), Guwahati-a mithiam a sáwm a, inbiakna kalpui mek a ni.

IIT mithiam­te'n a hmuna thil awm dan an zirchian zawhah Magisterial Inquiry chuan report an thehlut thei dawn a ni. Magis­terial Inquiry dinna order hi February 2018 tawp lamah tihchhuah a ni a, thla thum chhung hun pek niin, kumin May thla tawp lam thleng hun an nei.

Tarlan tawh angin, Turini lei hi February 13, 2018-ah dawh lai mekin mi pahnihin an zawh laiin a chim a, mi pakhat a thi. Lei chim tlaia Home Minister hoa sorkar mi pawimawhte ṭhukhawm chuan, lei chim chhan dik tak chhui chhuak tura Aizawl DC kaihhruai Magiste­rial Inquiry din an rêl a ni.

Hetih lai hian, lei dawh zawh a nih hmaa lei hêlna kawng tui lianin a chîm palha mihring kal kaina turin temporary foot bridge dawh a ni dawn. Temporary bridge dawhna atan hian NEDP aṭangin Planning department chuan cheng nuai 13 vel pek a rem ti tawh a, Finance department-in expenditure sanction a pek chhuah veleh lei dawh ṭan a ni ang.

PWD Engineer-in-Chief chuan lei dawhna tur ban siam hna thawktu SLT company-te chu May 15, 2018 hmaa hna zo turin a hriattir a; mahse, company lam chuan May 20 hma chuan an zawh theih loh tur thu an sawi thung.

Lei dawhna tur ban siam zawh a nih hnuah PWD mechanical engineer-te'n lei dawh hna an thawk dawn a, chawlhkar thum velah zawh theih an inbeisei a ni.