Solar energy chungchanga hmalakna sorkar department hotu lúte zirtir an ni

Mizoram sorkara secretary leh department hotu (head of department)-te pualin nimin khan Assembly Annexe conference hall-ah 'Solar Power Policy of Mizoram & Grid Connected Solar Rooftop Systems' tih thupui hmangin awareness seminar neih a ni a, Power & Electricity minister R Lalzirliana'n a hmanpui.

P&E minister R Lalzirliana chuan, Mizoramah lui tui chakna hmangin lui eng emaw zatah kawlphetha siam chhuah a ni a, chuti chung chuan Mizoram mamawh zat siam chhuah a la nih loh thu a sawi a, "Sorkarin kawlphethaa intodelh turin theihtawp a chhuah mek a, Tlawva luiah leh Kawlbemahte hydel project siam mek a ni a, Tuirini-ah pawh hydel project siam turin chak taka hmalak a ni," a ti.

Mizoram sorkarin hydel project pariat a enkawl mek aṭanga kawlphetha siam chhuah theih zat chu ruahtui leh tuihna tam danah a innghat lian hle tih sawiin R Lalzirliana chuan, "Nizung chakna hmanga kawlphetha a tam thei ang ber siam chhuah hi sorkarin a dah pawimawh em em a ni," a ti a; Mizoramah solar power plant siam ni tawh ṭhin mah se, department leh company rintlak lote thawhhona avangin sum tam tak khawhralnaah a chang ṭjhin niin a sawi.

P&E Minister chuan, Mizoram sorkarin Mizoram Solar Power Policy 2017 tihpui­tlin duh a tak zet tih sawiin, "A hlawhtinna turin department-te'n nodal agency Zoram Energy Development Agency (ZEDA) an thawhpui ngei a pawimawh hle dawn a ni," a ti.

"Mizoram sorkar Solar Power Policy chu budgetary support nei hman turin budget session-a ngaihtuah hman ni lo mah se, sorkar laipui leh state sorkar policy a nih avangin a dah pawimawh a, policy tihpuitlinna atan department-te sorkarin a theih dan kawngte dapin ṭanpui a tum a ni," a ti bawk.

Awareness seminar-ah hian ZEDA directgor David Ramnunsanga'n Mizoram Solar Power Policy 2017 leh Grid Connected Solar Rooftop Systems chungchang a sawifiah a; Mizoram Solar Power Policy tipuitling turin sorkar laipuia hmalakna Jawaharlal Nehru National Solar Mission(JNNSM) leh Deendayal Upadhyaya Gram Jyotin Yojana (DDUGJY) aṭanga sum awmte hman ṭangkai tum a nih thu a sawi.

National Institute of Solar Energy (NISE) chhût danin, Mizoramah solar energy megawatt 9,090 siam theih beisei a ni a, kum 2022-a Mizoramin solar energy siam tur a tuk chu megawatt 80 niin, hei hian in chung (rooftop) aṭanga siamte pawh a huam dawn. Tun dinhmunah Mizoram sorkarin ZEDA kaltlangin Solar Power Rooftop system kilowatt 3,555 pek chhuah theihin a peih tawh a, chu'ng zinga kilowatt 555 chu sorkar office building-a bun tura tih niin, kilowatt 3,000 chu mimal bun tura tih a ni thung.

P&E department tarlan danin, Mizoram sorkar hnuaia power unit pariatin kawlphetha an siam chhuah mek zat chu megawatt 29.5 a ni a, chu'ng zinga megawatt 8 chu Serlui-B Hydel Power Project-a siam chhuah a ni. Mizoram páwn aṭanga kawlphetha lei nan thla tin Mizoram sorkarin cheng vbc. 25-28 inkar a séng ziah anga chhût a ni.