Champhai North MLA-in zirlaite a fuih

Champhai North bialtu MLA TT Zothansanga chuan, nimin khan a bial chhunga sikul pahnih Govt. Champhai High School leh Govt GM Higher Secondary School a tlawh a, zirlaite a fuih.

TT Zothansanga chuan zirlai naupangte chu tum mumal tak nei tur leh inthununna, taimakna leh beih hram hram peihna thinlung pu turin a chah a, "Mi tam tak zinga hlawhtlinna chang tlemte an awm ṭhin a, chung zinga tel ve thei tur chuan nu leh pa, zirtirtu leh Pathian thuawih angai a ni," a ti.

Result ṭha tak nei thei tur chuan zirlai thiam bel a ngai tih sawiin TT Zothansanga chuan, "Social media hman dan chin tawk thiam pawh a ngai a ni. Mi taima, bei fat fat thin leh teirei peihte chu hlawhtlinna tlanga ding ṭhin," a ti a, a bial chhunga Mizoram Board Exam-a top ten a lang phate chu lawmman atan cheng sing nga zel a pek ṭhin tur thu a sawi.

TT Zothansanga chuan thiam thil neih dem dum aiin kalna lama thiam filawr nih a ṭul tih sawiin, "Bengvar tum luat ai chuan zirlai lama ṭanlak a ngai zawk. Champhai tlang chu zirna lama hmun dangte elpha ve tura ṭan lak a ngai a, nu leh pate pawhin hemi lama fate kan hruai harh leh chu thil pawimawh tak a ni," a ti.

Bialtu MLA Govt GM Higher Secondary School a tlawh ṭum hian principal K Pazawna leh a thawhpuiten an lo dawngsawng a, harsatna an neih an sawite chu a theih anga tihhlawhtlin MLA hian a tiam.