Central-in hleih neiin ro an rel - PC President

Peoples' Conference (PC) party president Lalhmangaiha Sailo chuan nimin khan thuchah a tichhuak a; sorkar laipui chu hleih nei taka rorel nia a ngaih thu a sawi.

Lalhmangaiha Sailo chuan, Mizoram-Assam kawngpui dan chungchangah Assam lam vuina chu Ministry of Home Affairs-in rang takin a bawhzui tih sawiin, "Cachar, Hailakandi leh Karimganj district hotute kawhmawh bàwl vanga Mizoramin harsatna a tawhte chu a bengkhawn ve lo a, a ṭha lo hle a ni. Hei hi Central sorkarin hleih nei takin rorelna a kalpuizia tilangtu a ni," a ti.

Assam-in Covid-19 guidelines leh instruction zâwm loa Mizoram ei leh bàr lâk luhna kawng an dang ṭhin chu khamawm a tih thu sawiin, "Ei tur leh mamawh phurtute chu Mizoram sor­karin para military force-te dilin a rang thei ang berin hruai chhuak rawh se," a ti a; sorkarin hma a lak vat loh chuan tute emaw sosangin mahnia hmalak tumin, an che chhuak ang tih a hlauhawm thu a sawi bawk.