Champhai dist.-a bank dinhmun thlirho

Nimin khan Champhai DC conference hall-ah Champhai District Consultative Committee (DCC) / District Level Review Committee (DLRC) chu an chairman Maria CT Zuali, bawrhsap hoin an ṭhu a, June 2020 quarter tàwp thlenga bank leh stakeholder hrang hrang hmalakna an thlirho.

Meeting-a tarlan danin, sorkar kum kal mekah, June 2020 thlenga Champhai district-a bank hrang hranga sum dah luh leh pek chhuah khaikhinna, credit deposit (CD) ratio chawhrual chu 42.43% a ni a; March 2020 quarter tàwpa CD ratio 45.47% aiin 3.04%-in a hniam a, CD ratio target 60% chu an pha lo.

Champhai district-ah loan rulh ṭhat loh Bakijai case 42, cheng nuai 21.61 vel hû a awm a, Mizoram Cooperative Apex Bank-ah cheng nuai 10.60 leh Canara Bank-ah cheng nuai 11 a awm.

Tun dinhmunah Champhai district-ah bank chi hrang hrang branch 14 a awm a, public sector bank pali, private sector bank pali, regional rural bank panga leh state cooperative pank pakhat a ni. ATM booth pakua, business correspondent pariat, CSP pakhat leh IPPB hnuaia banking touch point 26 a awm mek bawk.