Covid-19 vei mi 92 awm mek Quarantine zo tawh 2 an tel

Zarkawt Local Task Force (LTF) hruaitute hnen aṭanga Vang­laini thu dawn danin, an veng mi Covid-19 vei chu an chhuah ní-ah an inkhungna aṭangin a pain a hruai haw a, a pa chuan fimkhur thilah chawlh lain, office a kal lo nghal a, an chhung­kuain an inkhung nghal a ni. Covid-19 vei pawh chu June 7-a an ina a haw hnuah pindan hranah a hrangin an awmtir bawk.

Upper Republic LTF hruaitute chuan, an veng mi Covid-19 vei chu chhungkaw pangngai tak a ni a, quarantine facility aṭanga a chhuah hnuah chhuakvâk loin pindan hranah awmtir nghal a nih thu an sawi. Covid-19 a vei tih hriat a nih hnuah an in chu páwn lam aṭangin LTF-in an kalhsak.

SRH-ah nimin khan rinhlelh thilah mi pasarih dah luh thar an ni a, an zinga pakhat chu nimin khan swab sample laka endik niin, mi dang paruk chu vawiinah endik a ni ang.

SRH-ZMC Covid-19 Bulletin tarlan danin, hripui vei SRH-a enkawl mek mi 23 zinga pakhat chu ICU-ah a awm a, mi dang 22 chu Isolation Ward-ah enkawl an ni a; khawsik sang vak lo nei awm mah se, an vaiin ngaihtuahawm an ni lo.

SRH-ah hian mi 42 an awm mek a, Covid-19 vei ni lote chu Risk Ward-ah mi 11, Make Shift ICU/SARI Ward-ah pakhat, NICU-ah pakhat, Holding Ward-ah pathum leh MPW-ah pathum an awm a ni.