Dik lo taka thil ti kan hriat chuan an chungah kan theih anga nâ-a action lak kan tum - MPF
Mizoram People Forum (MPF) hruaitute chuan, nimin khan Aizawl Press Club-ah Tuirial bial MLA by-election lo awm tura an inbuatsaihna leh hmalaknate thuthar thehdarhtute an hrilh a, "Dik lo taka thil ti kan hriat chiante chungah chuan a na thei anga action lak kan tum," a ti.
MPF president Rev. Dr C Lalhlira chuan inthlan atana ngenna an siam leh thuchah an siamte chhiar chhuakin, "Vote thlak chu khua leh tui ṭhate tih tur a ni a, vote thlak ṭheuh turin kan insawm nawn leh a ni. Mi rinawm lo, mipat hmeichhiatna leh sum leh paia mi hmingchhiate, sum leh pai hmanga vote lei tumte leh tih theih loh tur intiam vak vak te hi mi rinawm lo an ni duh. Vote loh ngam a ṭha," a ti a, vote lei tumtute chuan vote leisak an tumte chu an hmusit tihna a nih thu sawi.
MLA inthlanah candidate pakhat tana sum sen tur zat bithliah chu cheng nuai 20 a nih thu sawiin MPF President chuan, "Cheng nuai 2 aia tam hi sen loh nise. Sum leh therhlo dang hmanga vote lei leh hralh hi election danin a phal loh avangin tih hauh loh tur a ni. Mimal leh pawlho pawhin candidate-te hnenah thil phut neih tur a ni lo. Chutih rualin thil chi hrang hrang, lukhum, shawl, sanitizer, football, silpouline, jersey, etc semte hi Election Model Code of Conduct-in a phal loh avangin tih loh tur a ni," a ti.
Rev. Dr C Lalhlira chuan candidate tan house to house campaign phal a nih thu sawiin, "Candidate-te hian mi pali thleng an hruai thei ang," a ti a, party member-te candidate tel lo chuan campaign phal a nih loh thu a sawi.
MPF hruaitute chuan Tuirial bial chu Kawnpui bial a nih lai aṭangin therhlo len nasatna hmun nia an hriat thu sawiin, "Chuvangin strict taka kal kan tum. Dik lo taka thil ti kan hriatte chungah chuan kan theih anga na-a action lak kan tum. A zau thei ang bera intihmualpho leh election hotute hnen thleng thlen kan tum a ni. Party-te sum senso tisang zawnga hma la lo tur te, mipuite ti chi ai zawng leh an vote hlu tak, sum leh therhlo leh intiamkamna hmanga leisak lo turin kan ngen a ni," a ti.
MPF hruaitute sawi danin, Tuirial by-election atan hian theihtawpin an inbuatsaih a, team 6-a in ṭhenin bial chhunga khaw awm zawng zawnga local forum leh political party-te inthlanna thianghlim leh felfai a awm theihna atan kawm an tum. Team ṭhenkhat chuan an khaw tlawh tur an tlawh tawh a, team dangte pawhin remchangah an tlawh ang. Hei bakah hian intinah lehkha semin, mipuite chu therhlo laka fihlim turin chah an ni dawn.
Hmun hrang hrang an kal kualna-ah party hrang hrangin flag an tar nasa hle tih sawiin MPF hruaitute chuan, "Ṭum dang zawng aiin a tam a, flag war emaw tih turin kan awm mai ang tih a hlauhawm. Thawhhona thuthlungah flag zar phal dan chin kan nei a ni," an ti.
MPF thuchah dang ṭhenkhat :
1) Campaign-naah mimala inbei loin policy leh manifesto hmanga campaign mai ni se
2) Media hmanga inbeih leh insawichhiat hi tih loh nise. Social media hmanga dik lo taka thu thehdarh hi danin a khap leh thehdarhtute chu na taka hrem theih an nih avangin tih hauh loh tur a ni. Hetiang ti an awm chuan rang taka bawhzui nghal a ni ang a, a ṭul angin puanzar a nih bakah election commission-ah emaw CID-Cyber Crime-ah emaw hriattir nghal zel a ni ang
3) Zu leh ruihhlo hmanga vote zawn hi Election Commission of India phal loh a nih avangin tih hauh loh tur a ni. Polling area bul hnaiah zu leh ruih theih thilin a tihbuai mekte awm phal a ni lo
4) Vote nei zawng zawngten zalen taka vote an thlak ṭheuh theihna atan ṭan lak theuh tur a ni
5) Dan dinglai angin tuman polling booth chhungah mobile phone ken luh loh tur a ni. Hemi atana mawh lo phur tur hian MPF duty emaw force mite emaw inruat ngei nise
6) Covid-19 hrileng avangin social distancing ngaipawimawhin, face mask leh hand sanitizer hman ngaihpawimawh ṭheuh nise
7) Polling area leh a chhehvelah inthlanni in campaign loh nise. Campaign hun a tawp tawh bakah vote thlak turte zalenna kan tibuai thei a, vote inleisak te a hrinchhuah theih avangin tih loh tur a ni.
8) Kum upa zual leh rualban lote intlartir reng lova, vote an thlak thuai theihna atan duty-ten hma la se
9) Ruaiṭheh leh picnic tih loh tur a ni