Volunteer-te'n nurse lakna result October 14 hma-a siamṭhat phût
Covid-19 avanga Mizoram sorkarin volunteer-a nurse a rawihte chuan October 14, 2021 hma ngeia tun hnaia ZMC-a thawk tur staff nurse 50 lakna result chu siamṭhat an phût. An thil phût hi Chief Minister hnenah ziakin an thlen.
Vanglaini palai zawhna chhangin volunteer nurse-te chuan, sorkarin a intiamna a tihlawhtling lo chu nâ an tih thu sawiin, "Staff nurse lakna result hi tihdanglam ngei kan phût a ni. Tihdanglam a nih loh chuan hmalak chhoh zel kan tum. Tin, staff nurse lakna-ah hian interview hmachhawn lo lakte pawh an awm a, a rilru nat thlak takzet," an ti.
Volunteer nurse-te chuan lak an nih dawnin sorkarin hna an zawn hunah ngaih pawimawh an tiam tih sawiin, "Min tiam lo se chuan tuna hnalakah hian phunnawi thei kan ni lo. Mah se, an intiam miau avanga lungawi lo kan ni," an ti a, staff nurse 50 lak turah hian seniority-a volunteer nurse-te thun vek an phut thu an sawi.
An hlawh chungchang pawh Chief Minister hnenah hian an thlen thu sawiin volunteer nurse-te chuan, "Tunah hian August leh September hlawh min la pe lo. Kan han ngaihven a, sanction a awm lo tihte a ni. Lak kan nih dawnah thla tin hlawh pek tura tih kan nih laiin, hetianga sanction awm lo an ti lehsi hi hriatthiam har kan ti hle," an ti.