Mi 500 velin PPE 14,000 ṭhui mek

Mizoram sorkarin tualchhunga kutthemthiamte tana a ruahman,'Scheme for Support of Local Artisans Who Lost Their Sources of Livelihood Due to Covid-19 Pandemic/ Lockdown' hnuaia Commerce & Industries department-in puanṭhui thiamte personal protective equipment (PPE) a ṭhuitir chu chhun­zawm zel a ni a, tunah hian Aizawl leh a chhehvela mi 500 velin PPE 14,000 an ṭhui mek.

PPE ṭhui thawh khatnaah 21,600 leh a thawh hnihnaah 14,900 ṭhui a ni a, a vaiin PPE 36,500 a ni. Hengte hi Health department hnenah pek vek a ni tawh.

Mizoram sorkar chuan PPE 40,000 ṭhuitir leh tura hma lain tun dinhmunah mi 500 velin PPE 14,000 an ṭhui mek a, nimin thleng khan ṭhui zawh sa 1,800 vel Health department hnenah an pe tawh.

Commerce & Industries (CI) department hotute chuan Vanglaini palai zawhna chhangin PPE ṭhui chu an chhunzawm zel theih an beisei thu an sawi a, "Tunah hian a ṭhuina senso hrang hrang - hmanrua leina leh a ṭhuitute hlawh tur hi Finance department aṭangin a la chhuak lo a, a chhuah thuai kan beisei," an ti a, mamawhna a san tawh avangin PPE 40,000 aṭangin 14,000 chu a ba-a an ṭhuitir rih thu an sawi.

Tarlan tawh ṭhin angin chief secretary Lalnunmawia Chuaungo kaihhruai State Disaster Management Authority hnuaia State Executive Committee (SEC) chuan tualchhunga ṭhui PPE hman ṭha a ti a, hemi bawhzui tur hian Commerce & Industries department an ruat a ni.

Commerce & Industries dept. chuan PPE hmanruate chu tualchhunga industry-te aṭangin a la khawm a, hemi hnu hian puanṭhuitute hnenah ṭhui turin an hlan leh ṭhin a ni.